Түркиянын БРИКСке кирүү мүмкүнчүлүгү бир гана туризм тармагында эмес, башка тармактарда да бирикменин ишмердүүлүгүнө чоң салым кошот.
Бул тууралуу БРИКСтин биргелешкен ишкердик кызматташуу борборунун төрагасы Висенте Барриентос РИА Новости агенттигине билдирди.
Буга чейин Түркиянын тышкы иштер министри Хакан Фидан өлкөсү БРИКСке мүчө болууну каалай турганын билдирген. Мындан тышкары, Фидан келерки аптада Россияга барып, БРИКС өлкөлөрүнүн Тышкы иштер министрлеринин Кеңешине катышууну пландоодо.
БРИКС өлкөлөрүнүн тышкы иштер министрлеринин жыйыны 10-11-июнда Нижний Новгород шаарында өтөт. Россиянын тышкы иштер министринин орун басары Сергей Рябковдун айтымында, иш-чара биримдикке кирбеген өнөктөштөрдүн катышуусуна байланыштуу кеңейтилген форматта өтөт.
“Түркия Республикасынын БРИКСке кирүү каалоосу жана ниети жөнүндөгү кабарди кубануу менен кабыл алдым, анткени бул биз үчүн экономикалык, социалдык, маданий жана билим берүү потенциалыбыздын дагы бир ырастоосу болмок. Ал эми Түркия бул жагдайда бир гана туризм жагынан эмес, түрк экономикасынын башка көптөгөн тармактарында да олуттуу салым кошо алмак”, – деди Барриентос Санкт-Петербург эл аралык экономикалык форумунун алкагында.
Ал БРИКСтин жакында кеңейиши бизнестин өсүшүнө оң таасирин тийгизиши мүмкүн экенин белгиледи.
Буга чейин РФ президентинин басма сөз катчысы Дмитрий Песков Түркиянын БРИКСке кирүү ниетине комментарий берип, Россия Түркиянын бул кызыгуусун кубаттай турганын билдирген.
БРИКСке алгач Бразилия, Россия, Индия, Кытай жана Түштүк Африка кирген. Бирок 2023-жылдын 22-24-августунда Йоханнесбургда Түштүк Африканын төрагалыгы алдында өткөн саммитте БРИКСке мүчө өлкөлөрдүн башчылары уюмдун кеңейиши боюнча декларация кабыл алышкан.
Ошонтип 2024-жылдын 1-январында Египет, Эфиопия, Иран, Сауд Арабиясы жана БАЭ бирикменин толук кандуу мүчөсү болушкан. Соңку учурда бул уюмга мүчө болууга ынтызарлыгын билдирген өлкөлөр көп.














