АКШнын президенти Дональд Трамп башка мамлекеттерге өз эркин таңуулоого жана аларды башкарууга аракет кылууга укуктуу эмес.
Бул тууралуу Бразилиянын президенти Луис Инасиу Лула да Силва билдирди.
«Президент Трамп АКШнын президенти болуп шайланган. Ал АКШны башкарууга укуктуу, бирок башка мамлекеттерди башкарууга укугу жок. Ал өз эркин таңуулоого укуктуу эмес», — деди ал CNN телеканалына берген маегинде.
Бразилиянын президенти азыркы АКШ администрациясы жүргүзүп жаткан тарифтик саясатты катаалдаштыруунун ордуна соода маселелери боюнча диалог жүргүзүүнүн маанилүүлүгүн белгиледи. Ошондой эле ар бир мамлекеттин эгемендиги бар экенин жана Вашингтондун башка өлкөлөргө өз эрежелерин таңуулоого укугу жок экенин айтты.
Июль айында АКШнын мамлекеттик катчысы Марко Рубио Бразилиядан импорттолуучу товарлардын басымдуу бөлүгүнө 25% өлчөмүндө бажы төлөмдөрүн киргизүү чечими кабыл алынганын жарыялаган.
Рубио бул кадамдын себептерин түшүндүрүп жатып, Бразилиянын президенти Луис Инасиу Лула да Силва жана анын өкмөтү «АКШ менен ак ниеттүү сүйлөшүүлөрдү жүргүзгөн эмес» деп билдирген.
Бразилиянын тышкы иштер министри Мауро Виейра болсо Вашингтон Түштүк Америка мамлекетинин ички рыногуна тоскоолдуксуз кирүү мүмкүнчүлүгүн берүү боюнча ультиматум мүнөзүндөгү талаптарды койгонун белгилеген.


















