Тегеран Батыш өлкөлөрү тарабынан кетирилген ар кандай жаңылыш кадамдарга тийиштүү жооп кайтарат. Бул тууралуу Иран парламентинин улуттук коопсуздук жана тышкы саясат боюнча комиссиясынын мүчөсү Алаэддин Боруджерди Mehr агенттигине берген маегинде билдирди.
Европа мамлекеттеринин Иранга каршы БУУнун Коопсуздук кеңешинин мурунку резолюцияларын кайра калыбына келтирүү жана ыкчам аракеттенүү механизмин иштетүү тууралуу акыркы коркутууларына жооп берип жатып, Боруджерди мындай деди:
«Иран Ислам Республикасы Батыштын ар бир жаңылыш кадамына пропорционалдуу жооп берип келген жана мындан ары да жооп бере берет».
Ал ошондой эле АКШ менен Израилдин Ирандын өзөктүк объектилерине болгон чабуулдары тууралуу мындай деди:
«Алар чоң жаңылыштык кетиришти жана анын кесепетин тартышты. Жооп катары Иран парламенти МАГАТЭ менен бардык кызматташууну токтотууну караган мыйзамды кабыл алды. Бул мыйзам Коопсуздук кеңеши тарабынан бекитилип, президентке өткөрүлүп берилди жана күчүнө кирди».
Боруджерди Иран принципиалдуу түрдө сүйлөшүүлөргө каршы эместигин, бирок алар өлкөнүн укуктарын урматтоого негизделиши керек экенин белгиледи:
«Биз уранды байытуу боюнча мыйзамдуу укугубуздан эч качан баш тартпайбыз. Бул — биздин эгемен укугубуз жана аны улуттук муктаждыктарыбызга ылайык ишке ашырууну улантабыз», — деди ал.

















