Борбор калаада “Бишкек жүргүнчүлөр автотранспорт ишканасы” муниципалдык ишканасына 124 жаңы автобус тапшырылды.
Узундугу 10,5 метр болгон автобустар жаратылыш газы менен жүрөт.
Мэриянын маалымат кызматынан билдиришкендей, иш-чарага Бишкек шаарынын мэри Айбек Джунушалиев, ЕРӨБ директору Айтен Рустамова, Финансы министринин орун басары Руслан Татиков жана Япониянын Кыргызстандагы элчиси Хидеки Года мырза катышты.
“Европа реконструкциялоо жана өнүктүрүү банкы (ЕРӨБ) тарабынан каржыланган «Жашыл шаарлар 2, терезе 2» программасынын «Бишкек автобустары» долбоорунун алкагында автобустар “Бишкек жүргүнчүлөр автотранспорт ишканасы” муниципалдык ишканасына тапшырылды. Долбоор Япония өкмөтүнүн грантынын эсебинен да колдоого алынган”, – деп айтылат маалыматта.
“Бишкек автобустары” долбоору – бул жаңы транспорт каражаттарын сатып алуу гана эмес, жалпы эле транспорт системасын модернизациялоого карай жасалган кадам. Оңдоо-өндүрүштүк имаратты жана галереясы бар административдик имаратты реконструкциялоо каралган. Долбоордун алкагында ишкананын ресурстарын пландоо системасы (ERP) GPS-навигациясыменен ишке киргизилет, бул муниципалдык автобустук ишкананын натыйжалуулугун олуттуу жогорулатат.
Белгилей кетсек, Бишкекте 30-январдан тарта коомдук транспортто жол кире акысы көтөрүлөт. Накталай төлөм менен жол кире 20 сом, “Тулпар” картасы менен 17 сом болот.



















