Беларус Республикасында президенттик шайлоо 26-январга белгиленип, мөөнөтүнөн мурда добуш берүү башталды.
Мурунку шайлоо 2020-жылдын августунда өткөн, ошондуктан 2025-жылкы шайлоону мөөнөтүнөн мурда деп эсептелүүдө.
Бийлик шайлоону январь айында өткөрүү чечимин Беларустун социалдык-экономикалык өнүгүүсүнүн беш жылдык планынын аткарылышы менен түшүндүргөн.
Өлкөнүн Борбордук шайлоо комиссиясынын берген маалыматына караганда, бул жолку өткөрүлө турган президенттик шайлоодо добуш берүүгө бара албагандар үчүн үкөктөр иштеп жатат. Добуш берүү өлкө боюнча 5 миң 325 шайлоо участкасында өтүп, анда 6 миллион 900 миң 504 шайлоочу катталган.
Беларуста президент 5 жылдык мөөнөткө шайланат.
Шайлоо участоктору жергиликтүү убакыт менен 26-январь, жекшемби күнү саат 8:00дөн 20:00гө чейин иштейт. Шайлоонун жыйынтыгы 5-февралдан кечиктирбестен жарыяланышы керек.
Шайлоого беш талапкер катталып, алардын бири Александр Лукашенко. Ал өлкөнүн биринчи президенти болуп келип, буга чейинки алты шайлоодо тең жеңип чыккан.
Ошентип А. Лукашенко – 1994-жылдан бери Беларусиянын туруктуу лидери аталып, КМШ өлкөлөрүнүн ичинен эң көп президенттик шайлоодо жеңишке жеткен лидерлердин катарын толуктайт.
70 жаштагы Лукашенко бул жолу жетинчи мөөнөткө шайлоого бара жатат. Аны менен дагы төрт талапкер бар.
Жергиликтүү массалык маалымат каражаттары белгилегендей, Лукашенко шайлоого “Бизди убакыт тандап алды”,- деген ураан менен ат салышууда.
Анын атаандаштарынын бири – Коммунисттик партиянын лидери Сергей Сыранков, Либерал-демократиялык партиянын төрагасы Олег Гайдукевич, Эмгек жана адилеттик партиясынын лидери Александр Хижняк жана Улуттук жыйындын Эл өкүлдөр палатасынын депутаты Анна Конопацкая болмокчу.
Эске сала кетсек, 2020-жылдагы Беларустагы президенттик шайлоо массалык нааразылык акциялары менен коштолгон.
Беларустун президенти бул жолу тополоң болуп кетсе, аскерлерди чакырып, интернетти жабууга даяр экенин билдирди. Ал “тартип болуш керек” деп эсептейт.
Жергиликтүү БизнесOnline агенттиги билдиргендей, АКШнын Мамлекеттик департаменти америкалык жарандарга Беларустан чыгып кетүүнү алдын ала сунуштады. Бирок өлкө башчысы коопсуздукту камсыз кылууга убада берүүдө.
Январдын башында Лукашенко “диктатура” темасында сүйлөп, “Украинадагыдай демократиядан Беларустагыдай диктатура жакшыраак”,- деп айткан.

















