Россияда 1-апрелден тартып Telegram толугу менен бөгөттөлөт. Бул тууралуу 17-февралда Baza телеграм-каналы өз булактарына таянып билдирди.
Каналдын маалыматына ылайык, ушул күндөн баштап Роскомнадзор (РКН) Instagram жана Facebook сыяктуу эле мессенжерди толук бөгөттөөгө киришет.
«Бул чара Россиянын бүткүл аймагында колдонулат: тиркеме мобилдик тармактар аркылуу да, стационардык интернет системалары аркылуу да жүктөлбөйт», — деп жазат Baza.
Роскомнадзор өз кезегинде РБКнын Россияда 1-апрелден тартып Telegram толук бөгөттөлөт деген маалыматка комментарий берүү өтүнүчүнө «мекемеде кошумчалай турган эч нерсе жок» деп жооп берген.
«Бул маселе боюнча мурда жарыяланган маалыматка кошумчалай турган эч нерсе жок», — деп билдиришти РКНнын басма сөз кызматынан.
10-февралдан тартып Роскомнадзор Telegramга карата бөгөттөөлөрдү күчөткөн. Мекеме бул чаралар россиялыктардын маалымат коопсуздугун камсыз кылуу жана мыйзамдарды сактоо максатында киргизилип жатканын тастыктаган.
13-февралдан 16-февралга чейин, акыркы төрт күн ичинде, Россиянын 80 аймагында жашоочулар Telegram ишинде үзгүлтүктөр болгонун билдиришкен. Бул тууралуу «Вёрстка» басылмасы интернет жана мессенжерлерге жеткиликтүүлүк боюнча россиялыктардын даттанууларын каттаган «На связи» долбоорунун маалыматтарына таянып жазды. Долбоордо Telegramдын иш сапаты жергиликтүү интернет-провайдерлерге көз каранды экени, дал ошолор мессенжерге жеткиликтүүлүктү чектеп жатканы белгиленген.
Telegramдын негиздөөчүсү Павел Дуров жооп иретинде мессенжер «басымга карабастан» сөз эркиндиги принцибин сактоону жана колдонуучулардын купуялуулугун коргоону уланта берерин билдирген. Буга чейин Telegram платформаны зыяндуу пайдаланууга, анын ичинде алдамчылыкка, зомбулукка жана диверсияга чакырыктарга каршы активдүү күрөшүп жатканын бир нече жолу билдирген.


















