Өзбекстандын жарандары визасыз бара ала турган мамлекеттердин саны 29га жетти.
2024-жылдын 16-январында БАЭнин Тышкы иштер министрлигинде Өзбекстан Республикасы менен Бириккен Араб Эмираттарынын өкмөттөрүнүн ортосундагы визалык талаптан өз ара бошотуу тууралуу кызматташуу боюнча протоколго кол коюлду. Бул тууралуу УзА маалымат агенттиги билдирди.
Бул документке ылайык, Өзбекстандын жарандары БАЭде болгон учурда 30 күндөн ашпаган мөөнөткө визалык талаптан бошотулат.
Өкмөттөр аралык протоколго Өзбекстандын БАЭдеги Толук жана Ыйгарым укуктуу Элчиси А. Оккулов жана БАЭнин тышкы иштер министринин орун басары Халид Абдулла Белхул кол коюшту.
Документ расмий түрдө 2024-жылдын 16-февралында күчүнө кирет.
Кол коюлган документ Өзбекстандын жарандары үчүн визасыз бара ала турган өлкөлөрдүн санын 29га жеткирет жана Өзбекстанды Global Passport Power рейтингинде 71-орунга көтөрөт.
Маалымат үчүн, 2023-жылы БАЭге 119 454 Өзбекстандын жарандары барышып, виза алууга 9,2 миллион доллар коротушкан.


















