Азербайжандын Москвадагы элчиси Рахман Мустафаев Россиянын Тышкы иштер министрлигине Бакудагы Sputnik агенттигинин эки журналисти кармалгандан кийин чакыртылды.
Бул тууралуу РИА Новости агенттиги билдирди.
“Бакунун достукка жатпаган аракеттерине жана россиялык журналисттерди мыйзамсыз кармоого байланыштуу чакырылган”,- деп айтылат агенттиктин маалыматында.
Билдирүүгө караганда, 30-июнь күнү эртең менен Азербайжандын ички иштер министрлиги Бакудагы Sputnik агенттигинин кеңсесинде “операция” жүрүп жатканын билдирген.
Ал эми Москвадагы Sputnik агенттиги Баку менен байланыш жок экенин РИА новостиге ырастаган.
Кийинчерээк маалым болгондой, Бакунун коопсуздук күчтөрү агенттиктин жетекчиси Игорь Картавих менен башкы редактор Евгений Белоусовду “Россия Федерациясынын Федералдык коопсуздук кызматынын агенттери” деп кармаган.
Азербайжандын ички иштер министрлиги да Sputnik агенттигинин кеңсесинде 30-июнда ыкчам-издөө иш-чараларынын жүрүшүндө бир нече адам кармалганы тууралуу маалыматты тастыктады.
Департамент Sputnik Азербайжандын ишмердүүлүгү тууралуу оперативдүү маалыматты “2025-жылдын февраль айында аккредитациясы токтотулганына карабастан, мыйзамсыз каржылоо” деген негизде иликтөө жарыялаган.
Буга чейин ушул жылдын февраль айында Азербайжандын тышкы иштер министрлиги Sputnik агенттигинин өлкөдөгү ишин токтотуу ниетин билдирген.
Бирок Sputnikтин редакциясы Азербайжандагы жумушуна расмий тыюу салынбаганын айткан. Ал эми бул убакыт аралыгында эки өлкөнүн тышкы иштер министрликтеринин жумушчу топторунун ортосунда мүмкүн болгон пикир келишпестиктерди чечүү темасы боюнча конструктивдүү диалог жүргүзүлүп жаткан.
Кошумчалай кетсек, буга чейин Азербайжандын Милли Межилисинин парламенттик делегациясы Россия Федерациясынын Федералдык жыйынынын Парламенттер аралык кызматташтык боюнча комиссиясынын Москвада өтө турган 23-жыйынына катышпай турганын жарыяласа, Маданият министрлиги Россия тарап менен бирге уюштурулуп жаткан бардык маданий иш-чараларын токтоткон.
Расмий Бакунун мындай кадамдары “Россиянын укук коргоо органдары Екатеринбургда улутуна карап азербайжандыктарга каршы жасаган максаттуу киши өлтүрүүлөр жана зордук-зомбулук аракеттери” себеп болгон.



















