Азербайжан БРИКСке кошулууга расмий арыз бергенин республиканын Тышкы иштер министрлигинин басма сөз кызматынын жетекчиси Айхан Хажизаде билдирди.
“Азербайжан расмий арызын берди”, — деди ведомствонун өкүлү.
БРИКС — 2006-жылы түзүлгөн өкмөттөр аралык уюм. Ага Бразилия, Россия, Индия, Кытай, Түштүк Африка, Египет, Эфиопия, Иран жана Бириккен Араб Эмирликтери кирет.
Июль айынын башында Шанхай кызматташтык уюмунун Астанадагы саммитинин алкагында Азербайжан менен Кытайдын ортосунда стратегиялык өнөктөштүктү түзүү боюнча декларация кабыл алынган. Анда Азербайжан БРИКСке кошулуу ниетин билдирген, ал эми Кытай Бакунун бирикме менен кызматташуусун кубаттаган.
Азербайжандын БРИКС менен кызматташтыкты чыңдоого кызыкчылыгы бар экендиги Владимир Путин менен Илхам Алиевдин кечээки биргелешкен билдирүүсүндө да айтылган. Документте Москва Бакунун бул аракетин колдой турганы белгиленген.
Андан сырткары, Путин Алиевди ушул жылдын октябрь айында Казанда БРИКС саммитинин алкагында өтө турган “аутрич” форматындагы жолугушууга чакырган. Ага 10-15 дос мамлекеттердин өкүлдөрү катышары кабарланган.
Эске салсак, июнь айында Россиянын тышкы иштер министри Сергей Лавров биримдиктин мүчөлөрү мындан ары кеңейүү маселеси боюнча “тыныгуу алуу” чечимин кабыл алышканын билдирген. Анда Россия президентинин жардамчысы Юрий Ушаков БРИКСке кирүү үчүн 30дан ашуун мамлекет арыз бергенин айткан. Бирок өлкөлөрдүн так тизмеси айтылган эмес.
Буга чейин Түштүк Африканын тышкы иштер министри Наледи Пандор уюмга кирүү үчүн расмий арыз берген 23 өлкөнүн тизмесин жарыялаган.



















