Казакстандын Алматы шаарында башталган “Алматы – биздин жалпы үйүбүз” кампаниясынын алкагында “Таштандыны кофе/снэкке алмаштыр” аттуу акциясы өткөрүлөт, деп билдирди шаардык акимчиликтин басма сөз кызматы.
Акция 15-апрелден 8-майга чейин өткөрүлөт.
“Таштандыны кофе/снэкке алмаштыр” – бул экологиялык демилге, ал шаар тургундарын белек купондорунун ордуна экинчилик сырьелорду кайра иштетүү үчүн чогултууга жана өткөрүүгө түрткү берет. Акция таштандылар менен байланышкан көйгөйлөр жана аларды кайра иштетүүнүн маанилүүлүгү жөнүндө маалымдуулукту жогорулатууга багытталган”, – деп айтылат маалыматта.
Акцияга Алматы шаарынын бардык каалоочулары жана коноктору катыша алат. Катышуучуларга макулатура, пластик бөтөлкөлөр, алюминий банкалар, айнек бөтөлкөлөрдү кошкондо кайра иштетүү үчүн белгилүү бир көлөмдөгү материалдарды өз алдынча чогултуу сунушталат.
Жарандар чогулган материалдарды кайра иштетүүчү жайларга тапшырып, анын ордуна пицца, бургер, кофе, дөнер жана додстерге купон ала алышат. Ар бир чыгарылган купондун өзүнүн уникалдуу промо-коду болот, анда акцияга катышкан тамак-аш сатуучу жайлардын даректери жазылган.
Катышуучулар кайра иштетилүүчү материалдарды төмөнкү шарттарда купондорго алмаштыра алышат:
- 2 кг макулатураны (кагаз, картон) – кофе купонуна;
- 1 кг пластик бөтөлкөнү – бургер купонуна;
- 1 кг алюминий банканы – бир дөнер же додстер купонуна;
- 3 кг тунук айнек (түссүз) бөтөлкөнү – пицца купонуна.
Купондор акция бүткөнгө чейин жарактуу.
Эске салсак, буга чейин Казакстанда таштандыдан айнек идиштер жана унаа бамперлери чыгарыла турганы маалымдалган.



















