Казакстанда өкмөттүн жыйынында ири шаарларда катуу тиричилик таштандыларын кайра иштетүүчү заводдорду куруу маселеси каралды.
Экология министри Ерлан Нысанбаев 2023-жылы Казакстанда 4,1 миллион тоннага жакын коммуналдык таштанды топтолуп, анын бир миллион тоннасы гана иргелип, кайра иштетилгенин билдирди.
Ал мындан бир жыл мурун өлкөдө 4,3 миллион тонна катуу таштанды чогултулуп, анын 25%ы кайра иштетилип, калганы таштанды таштоочу жайларга көмүлгөнүн кошумчалады.
Министрдин айтымында, коммуналдык таштандылардын курамынын 70%га жакыны пайдалуу фракциялардан турат: 16% пластик (656 миң тонна), 11% макулатура (451 миң тонна), 9% айнек (369 миң тонна), 37% органикалык калдыктар , 27% башкалар.
Бирок бул пайдалуу фракцияларды «чыгарып», экинчи сырьёну жетиштүү сапатта алуу үчүн өлкөдө калдыктарды чогултуу, ташуу жана терең сорттоо боюнча эбегейсиз зор иштерди жүргүзүү керек, деп баса белгиледи Нысанбаев.
Ошол эле учурда экология министрлигинин башчысы республиканын өкмөтү таштандыларды башкаруу жаатындагы долбоорлорду жеңилдетилген каржылоо механизмин бекиткенин айтты.
Бүгүнкү күндө өлкө боюнча 232,2 миллиард теңгеге 94 долбоор тандалып алынганын кошумчалады Нысанбаев.
Анын айтымында, долбоорлор ишке ашырылса брусчатка, люктар, таштанды челектери, айнек идиштер, стрейч пленка, автобамперлер жана башка керектөөчү товарларды чыгаруу ишке киргизилет.
Премьер-министр Олжас Бектенов бул жаатта башталган бардык долбоорлорду ишке киргизүүнү тездетүү керектигин баса белгилеп, таштандыларды башкаруунун так системасы экономикалык жана экологиялык эффект гана бербестен, ишканалардын ачылышына, жаңы технологиялардын тартылышына, жумуш орундарынын түзүлүшүнө өбөлгө болот деп эсептеди.
Эске салсак, буга чейин Бишкек шаарында Борбор Азияда биринчилерден болуп эл аралык стандарттарга жооп берген таштанды өрттөөчү завод куруларын мэриядан билдиришкен.



















