АКШнын президенти Дональд Трамп 2025-жылдын 20-январында кызматка киришкенден бери анын администрациясы болжол менен 80 000 иммиграциялык эмес визаны жокко чыгарды. Бул жокко чыгаруулардын себептери мас абалында унаа айдоодон баштап, кол салууга жана уурулукка чейинки мыйзам бузууларга айыпталгандар болуп саналат.
Бул тууралуу АКШнын Мамлекеттик департаментинин берген маалыматына таянып Reuters агенттиги жазды.
Белгиленгендей, Трамп кызматка киришкенден баштап иммиграциялык иштер күч алып, анын ичинде жарактуу визасы барларды кошо алганда болуп көрбөгөндөй сандагы мигранттар депортацияланган.
Мындан тышкары, администрация социалдык медианы текшерүүнү күчөтүп, катаал виза саясатын кабыл алган. Визаны жокко чыгаруулардын болжол менен 16 000и мас абалында унаа айдоо кылмыштарына байланыштуу болсо, 12 000ге жакыны кол салуу жана дагы 8000и уурулук үчүн болгон.
“Бул үч кылмыш быйыл жокко чыгаруулардын дээрлик жарымын түзгөн”, – деген мамлекеттик департаменттин өкүлү.
Анын айтымында, август айында Вашингтон 6000ден ашык студенттик визаны мөөнөтүнөн ашыкча жүргөндүгү жана мыйзамды бузгандыгы үчүн, анын ичинде “терроризмди колдоо” үчүн жокко чыгарган. Андан сырткары консервативдүү активист Чарли Кирктин өлтүрүлүшү тууралуу социалдык медиадагы комментарийлерден улам кеминде алты адамдын визасы да жокко чыгарылган.
Буга чейин АКШнын мамлекеттик катчысы Марко Рубио май айында АКШнын тышкы саясатынын артыкчылыктарына каршы келген иш-аракеттерге катышкандыгы үчүн жүздөгөн, балким миңдеген адамдардын, анын ичинде студенттердин визаларын жокко чыгарганын жарыялаган.
Трамптын администрациясынын кызматкерлери студенттик виза жана грин-карта ээлери палестиналыктарды колдогондугу жана Газа согушундагы Израилдин жүрүм-турумун сынга алгандыгы үчүн депортацияланышы мүмкүн экенин билдиришип, алардын аракеттерин АКШнын тышкы саясатына коркунуч келтирет деп атап, ХАМАСты жактады деп айыпташкан.















