АКШнын түштүк аймактарын, Орто Батышын жана чыгыш жээктерин каптаган каттуу ысыктан кеминде 25 адам каза болду. Бул тууралуу NBC телеканалы билдирди.
Эң көп өлүм фактысы Нью-Жерси штатында катталып, анда 22 адам каза болгон. Алардын басымдуу бөлүгү 30 жаштан 80 жашка чейинки адамдар болгон.
«Бул кадимки жайкы ысык эмес. Мындай аптап ар кандай курактагы адамдардын жана жаныбарлардын өмүрүнө кыска убакыттын ичинде эле олуттуу коркунуч жаратышы мүмкүн», — деди штаттын Саламаттык сактоо департаментинин өкүлү Даля Эвайс.
Мындан тышкары, Иллинойс штатындагы Кук округунда дагы бир адамдын каза болгону ырасталды. Миссисипи штатында 74 жаштагы эркек киши күн өтүп каза болсо, Массачусетс штатындагы Болтон шаарында 83 жаштагы аял аптаптан көз жумган.
4-июлда АКШнын Улуттук метеорологиялык кызматы өлкөнүн чыгыш бөлүгүндө жашаган дээрлик 156 миллион адам үчүн аномалдуу ысык боюнча эскертүү жарыялаган. Маалыматка ылайык, бир катар аймактарда, анын ичинде Колумбия округунда, Норфолкто жана Ролиде абанын температурасы 100°F (болжол менен +38°C) көрсөткүчүнөн ашкан.
Жакынкы күндөрү АКШнын түндүк-чыгышында абанын температурасы бир аз төмөндөйт деп күтүлүүдө. Бирок абанын нымдуулугу жогору бойдон калып, муунткан ысык сакталары айтылууда. Бийлик өкүлдөрү жарандарды сак болууга чакырышты.
Маалымат үчүн
4-июлда Reuters агенттиги АКШнын борбордук жана чыгыш штаттарын каптаган аптаптуу ысыктан улам ондогон шаарларда Эгемендүүлүк күнүнө арналган майрамдык иш-чаралар токтотулганын же башка убакытка жылдырылганын кабарлаган.
Атап айтканда, Вашингтон, Филадельфия, Хаддон-Тауншип жана Уотертаун шаарларындагы параддар жокко чыгарылган. Ал эми Бостон шаарында майрамдык фейерверк төрт саатка кечиктирилген.
Быйыл, 4-июлда, АКШ Эгемендүүлүк декларациясынын кабыл алынганынын 250 жылдыгын белгиледи.

















