Өткөн жылы АКШга баруу үчүн B-1/B-2 категориясындагы визаны алуу максатында арыз берген өзбек жарандарынын үчтөн экиси баш тартуу жообун алышкан. Бул Борбор Азия өлкөлөрүнүн ичиндеги эң жогорку көрсөткүч болуп калды.
АКШнын Мамлекеттик департаментинин жарыяланган отчетуна ылайык, 2024-жылдагы каржы жылында Өзбекстандын жарандары берген B-1/B-2 категориясындагы визалардын 64,41%ы четке кагылган. Бул Борбор Азиядагы эң жогорку баш тартуу көрсөткүчү болуп эсептелет.
Тактап айтканда:
-
Түркмөнстандан — 58,8 %,
-
Казакстандан — 46,29 %,
-
Тажикстандан — 45,24 %,
-
Кыргызстандан — 39,14 % арыз ээлери баш тартууга туш болушкан.
2023-жылы да Өзбекстан жарандары үчүн баш тартуу көрсөткүчү жогору болгон — 59,56 %. Ал жылы да Өзбекстан региондо биринчи орунда турган.
Дүйнө жүзү боюнча эң көп баш тартуу Лаос жарандарына карата болгон — 82,84 %. Баш тартуулардын жогорку пайызына төмөнкү өлкөлөр дагы кирген:
-
Сомали — 77,02 %,
-
Гвинея-Бисау — 76,59 %,
-
Сенегал — 74,65 %,
-
Гвинея — 70,25 %.
Ал эми эң аз баш тартууга туш болгон өлкөлөр:
-
Бириккен Араб Эмираттары — 1,46 %,
-
Кипр — 2,16 %,
-
Румыния — 2,61 %.
Маалымат үчүн: B-1/B-2 категориясындагы визалар АКШга кыска мөөнөттүү сапарлар үчүн берилет — туризм, туугандар менен жолугуу, дарылануу жана бизнес жолугушуулар.
Буга чейин АКШнын Ташкенттеги элчилиги Өзбекстандын жарандарына билим берүү жана алмашуу программаларына катышуу үчүн виза сураганда, социалдык тармактардагы жеке маалымат орнотууларын «ачык» режимге өткөрүүнү өтүнгөн. Элчилик мындай кадам виза алуу укугун текшерүүнү жеңилдетет деп түшүндүргөн. Эгер талапкер бул маалыматтарды берүүдөн баш тартса, виза алуу укугун жоготуп коюшу мүмкүн.















