Париждин прокуратурасы Франциянын борборундагы еврей мектебине каршы жасалган вандализм фактылары боюнча иликтөө баштады.
Бул тууралуу Agence France-Presse укук коргоо органдарындагы булакка таянып кабарлады.
Маалыматка ылайык, Париждин XX округунда жайгашкан «Бет Любавич» мектебине кол салуу 31-январь кечинде болгон. Имараттын терезелери сындырылып, фасадынан видеокамера жана мемориалдык такта жулуп алынган.
Шаардык прокуратура уюшкан топ тарабынан антидиндик себептер менен мүлккө зыян келтирүү фактысы боюнча иш козгоду. Округдун полиция комиссариаты кылмышка шектүүлөрдү издөө иштерин баштады.
Франциянын Ички иштер министрлигинин маалыматына ылайык, 2024-жылы өлкөдө антисемиттик мүнөздөгү 1 570 акт катталган. Ал эми 2025-жылы бул көрсөткүч, алдын ала маалыматтар боюнча, 1 163тү түзгөн. Өткөн жылдын ноябрь айында ички иштер министри Лоран Нуньес республикада динге каршы кылмыштардын 60%ы антисемитизм негизинде жасаларын белгилеген. Ошондой эле ал еврей жамаатына бийлик антисемитизмге каршы чечкиндүү күрөш жүргүзөрүн ишендирген.


















