Чүй облусунун түзүлгөндүгүнүн 100 жылдык мааракеси 9–10-октябрь күндөрү масштабдуу түрдө өлкө аймагында зор салтанат менен белгиленди.
Бир кылымдык жолду карыткан Сары-Өзөн Чүйдүн бул мааракеси жөн гана майрамдык шаң эмес, аймактын өтмүшүнө сарамжалдуу кылчайып, келечегине ишенимдүү кадам таштоонун символуна айланды.
Борбордук иш-чараларга Өлкө башчысы Садыр Жапаров баштаган мамлекеттик жетекчилер, чет элдик коноктор, жергиликтүү бийлик өкүлдөрү жана миңдеген тургундар катышты.
Президент Садыр Жапаров Сары-Өзөн Чүйдүн бир кылымдык мааракеси менен куттуктады. Ал өз сөзүндө байыркы Жибек Жолу аралап өткөн Сары-Өзөн Чүй – айтылуу Баласагын, Суяб, Ак-Бешим, Жүл сыяктуу тарыхый шаарлардын таржымалын ичине катып, доордон доорго өткөрүп келет. Кыргызстандын соңку тарыхынын өзөгү да Сары-Өзөн Чүйдүн 100 жылдык басып өткөн жолу менен даңазалуу экендигине токтолду.
“Бүгүнкү эгемен Кыргызстандын пайдубалын түптөгөн журт аталары дал ушул Чүй боорунда биригип, мамлекеттүүлүк үчүн кара баштарын баталгыга байлап, тагдыр чечер чечимдерди кабыл алууга канын-жанын арнашкан. Эсилдердин көбүнүн сөөгү дал ушул Чүй бооруна жашырылган.
Чүй өрөөнүнүн символу болгон Бурана да, Ата-Бейит да ошол улуу тарыхтын үнсүз күбөлөрү.
Мына ошол Кыргызстандын жаркын келечегине байланышкан окуялардын чордонуна айланган кең Сары-Өзөн бүгүн да жети дубандагы элдин, 80ден ашык этностун өкүлдөрүн койнуна батырып, ынтымактын, достуктун жана токчулуктун үлгүсүнө айланып, кут-берекесин төгүп келе жатат”, – деди президент.
Майрамдын негизги маданий очогу Бишкек шаарынын борбордук “Ала-Тоо” аянтында уланып, Чүй облусунун бир кылымдык басып өткөн жолун, Улуу Жибек жолундагы тарыхый ордун, маданиятын жана заманбап өнүгүүсүн чагылдырган масштабдуу театрлаштырылган көрүнүш тартууланды. Иш-чара өлкөнүн мыкты өнөрпоздорунун коштоосундагы чоң гала-концерт менен уланды.
Мындан тышкары, Т. Усубалиев атындагы аянтта облустун жетишкендиктерин чагылдырган ири көргөзмө-жармаңке уюштурулду. Анда Чүйдүн дыйкан-фермерлеринин, өндүрүш ишканаларынын продукциялары жана улуттук кол өнөрчүлөрдүн эмгектери конокторго сунушталды.
Ошондой эле, иш-чаранын алкагында жаш лидерлердин жана активисттердин башын бириктирген “Кыялымдагы Кыргызстан: Чүй – 100 жыл” аттуу форум өттү. Форумда аймактын экологиялык, санариптик жана экономикалык келечеги тууралуу жаштардын инновациялык идеялары ортого салынды.
Эң өзгөчөлөнгөнү 128 метрлик дүйнөдөгү эң узун чучук болду.
Бул мааракенин эң өзгөчөлөнгөн, тарыхта кала турган окуясы — ата мекендик “Тойбосс” компаниясы тарабынан даярдалган дүйнөдөгү эң узун чучуктун бет ачары болду. Бул демилге улуттук ашкананын кадыр-баркын эл аралык деңгээлде даңазалоо максатын көздөдү.
“Тойбосс” компаниясынын кызматкерлеринин айтымында, жаңы рекордго чыккан чучуктун чийкилей узундугу 140 метрди, ал эми бышкандан кийинки таза узундугу 128 метрди түздү. Бул көрсөткүч менен Кыргызстан 2018-жылы катталган 117 метрлик өзүнүн мурунку рекордун жаңылады.
Сый тамакты даярдоого 400 килограммдан ашык таза жылкы эти, казы жана атайын тандалган улуттук татымалдар колдонулган.
“Тойбосс” компаниясынын ондогон тажрыйбалуу кызматкерлери чучукту бир калыпта байлап чыгышкан. Ал эми бул гиганттык деликатести бышыруу процесси 6 саатка созулган.
Эски аянтта өткөн салтанаттуу бет ачардан кийин, бул тарыхый тамак атайын бөлүктөргө кесилип, майрамдын миңдеген конокторуна жана борбор калаанын тургундарына бекер таратылды.
Бул кадам майрамдын нукура кыргыздын кең пейилдик, меймандостук салтын дагы бир жолу айгинелеп, Сары-Өзөн Чүйдүн
облусунун 100 жылдыгы — бул жөн гана календардык дата эмес, өлкөнүн социалдык-экономикалык өнүгүүсүнүн маанилүү баскычы болуп калды.
Экономикалык жактан алып караганда, Чүй облусу Кыргызстандын ички дүң продукциясынын) олуттуу бөлүгүн камсыз кылган, өнөр жай жана айыл чарбасы эң жогорку деңгээлде өнүккөн аймак. Ири ишканалардын, логистикалык борборлордун жана кайра иштетүүчү өндүрүштүн бул аймакта жайгашуусу — облустун стратегиялык маанисин көрсөтүп, өнүккөн инфраструктурасы аркылуу облус тышкы инвестицияны тартууда алдыңкы орунда турат.
Чүй – токсондон ашык улуттун өкүлдөрү байырлаган маданий көп түрдүүлүктүн жана ички миграциянын борбору.
Даярдаган Турдайым Кожомбердиева














