Казакстандын суу ресурстары жана ирригация министри Нуржан Нуржигитов Өкмөттүн жыйынында 2026-жылдын вегетациялык мезгилинде түштүк аймактарда суу тартыштыгы жаралышы мүмкүн экенин билдирди. Бул тууралуу Kazinform маалымдады.
Анын айтымында, Talsim-NG гидрологиялык моделине ылайык, Сырдарья жана Талас дарыяларынын бассейндеринде суу көлөмү көп жылдык орточо көрсөткүчтөн төмөн болот деп күтүлүүдө. Сырдарьянын айрым куймаларында жана Шу дарыясынын бассейнинде агын суунун көлөмү норма чегинде болжолдонууда. Ал эми Или дарыясынын бассейнинде жалпысынан суу көлөмү нормалдуу болот, бирок айрым куймаларында нормадан жогору болушу мүмкүн.
«Ошентип, 2026-жылдын вегетациялык мезгили түштүк аймактарда, өзгөчө Арал–Сырдарья жана Шу–Талас бассейндеринде тобокелдик менен өтүшү мүмкүн. Тактап айтканда, Токтогул суу сактагычынын көлөмү өткөн жылга салыштырмалуу 1,5 куб чакырымга аз. Энергия тартыштыгы шартында суу сактагыч күчөтүлгөн режимде пайдаланылууда. Ушуга байланыштуу вегетация башталганда Токтогул суу сактагычы топтоо режимине өткөрүлөт деп болжолдонууда. Бул болсо Түркестан облусунун Мактаарал жана Жетысай райондору үчүн мамлекеттер аралык «Достук» каналы аркылуу суу жеткирүүгө терс таасирин тийгизиши мүмкүн», — деди министр.
Буга байланыштуу акимиаттарга суу алуу лимиттерин, анын ичинде күрүч айдоого коюлган чектөөлөрдү так сактоо тапшырылды. Түркестан облусунда «Достук» каналы боюнча күрүч айдоодон баш тартуу сунушталууда, Кызылкум каналы боюнча — 3,5 миң гектардан ашпоого, ал эми Кызылорда облусунда — 70 миң гектардан ашпоого тийиш.
«Учурдагы кырдаалды эске алуу менен Шардара суу сактагычысуу топтоо режимине өткөрүлдү. Макулдашылган суу берүү режимдери сакталган шартта кеминде 8,3 куб чакырым суу түшүшү күтүлүүдө. Бул Шардара суу сактагычында 5,0 куб чакырымдай суу топтоого, Коксарайский контррегуляторду 2,0 куб чакырымга чейин толтурууга жана Кызылорда облусуна болжол менен 1,3 куб чакырым суу берүүгө мүмкүндүк берет», — деп билдирди Нуржигитов.
Шу–Талас бассейнинде Киров суу сактагычы — Жамбыл облусунун негизги ичүүчү жана сугат суу булагы — жетиштүү көлөмдө толбой калуу коркунучу сакталып турат. Азыр анын көлөмү 314 млн куб метрди түзөт, бул өткөн жылдагы деңгээлден 1,5 эсеге төмөн. 1-апрелге карата 400–410 млн куб метрге жетет деп күтүлүүдө, ал эми минималдуу керектөө болжол менен 400 млн куб метрди түзөт. Мында Казакстан үчүн суу алуу үлүшү болгону 285 млн куб метр болушу мүмкүн.



















