Алдыдагы үч жыл ичинде Россия башка мамлекеттерге 1,8 трлн рубль (же болжол менен 18,5 млрд доллар) өлчөмүндө мамлекеттик насыяларды берет. Бул мурда пландалгандан 14% көбүрөөк, деп жазды «Известия» өкмөттүн 2026–2028-жылдарга карата бюджет долбооруна шилтеме кылып.
Документке ылайык, 2026-жылы Россия 599 млрд рубль, 2027-жылы — 575 млрд, ал эми 2028-жылы — 601 млрд рубль насыя берүүнү көздөп жатат. Эсептөөлөр Экономикалык өнүгүү министрлигинин божомолуна негизделген: анда доллардын орточо курсу 2026-жылы 100,2 рубль, 2027-жылы — 103,5, ал эми 2028-жылы — 106 рубль болот деп күтүлүүдө.
Өкмөт бул каражаттар бүтө элек долбоорлорду аяктоо, эл аралык милдеттенмелерди аткаруу жана орус өндүрүшүнүн экспортун колдоо үчүн зарыл экенин белгилеген.
ИПЭИ Президенттик академиясынын изилдөөчүсү Владимир Еремкиндин айтымында, мындай насыялар негизинен стратегиялык өнөктөш өлкөлөргө жана Москва үчүн маанилүү аймактардагы мамлекеттерге берилет. Анын ичинде ЕАЭБ мүчөлөрү — Беларусь, Армения, Кыргызстан жана Казакстан бар. Аларга интеграциялык долбоорлорду өнүктүрүү жана союздук байланыштарды бекемдөө үчүн каражат бөлүнөт. Ошондой эле Азиядагы (Вьетнам, Монголия, Индия), Африка жана Жакынкы Чыгыштагы (Египет, Түркия, Алжир) жана Латын Америкасындагы (Никарагуа, Куба) айрым өлкөлөр да бул программадан каржылык жардам алышат.
AMarket аналитиги Игорь Расторгуевдин айтымында, негизинен сөз атомдук электр станцияларын куруу жана жогорку технологиялуу орус продукциясынын экспортун колдоо тууралуу болууда. Азыркы учурда «Росатом» Египеттеги «Эль-Дабаа» ($25 млрд), Түркиядагы «Аккую» ($22 млрд), Бангладештеги «Руппур» ($11,38 млрд) долбоорлорун ишке ашырууда. Ошондой эле Индияда, Венгрияда жана Иранда да атомдук долбоорлор жүрүп жатат.
Мындан тышкары, Россия өкмөтү Иранда темир жол куруу үчүн 1,3 млрд евро, ал эми Вьетнамга орус курал-жарагын сатып алуу үчүн экспорттук насыя берүүнү пландаган.
Насыя берүү программасы өкмөттөр аралык келишимдердин негизинде түзүлөт, бирок мындай келишимдердин мазмуну жашыруун бойдон калууда, деп билдирди РФ Финансы министрлиги.
Дүйнөлүк банктын маалыматына ылайык, 2022-жылдын аягында башка өлкөлөрдүн Россия алдындагы жалпы карызы $28,9 млрд (азыркы курс менен болжол менен 2,3 трлн рубль) түзгөн. Ири карыз алуучулар — Беларусь ($8,2 млрд), Бангладеш ($5,9 млрд), Индия ($3,8 млрд), Египет ($1,8 млрд) жана Вьетнам ($1,4 млрд) болгон.
Ошол эле учурда өкмөт 2026–2028-жылдар аралыгында 708 млрд рубль (8 млрд доллар) көлөмүндөгү мурун берилген насыялар кайтарылат деп күтүп жатат.
Freedom Finance Global компаниясынын аналитиги Наталья Мильчакованын түшүндүрмөсүндө, бул сумма жаңы берилчү насыялардан аз, анткени Москва айрым өлкөлөр карыздарын өз убагында кайтара албайт же узак мөөнөттөр менен төлөйт деп түшүнөт.
Эксперт ошондой эле мындай «жомарттык» таптакыр бекер эмес деп белгиледи — анткени насыя алып жаткан көптөгөн өлкөлөр Россияга Батыш санкцияларын айланып өтүүгө жардам берип келишет.



















