Индиянын мамлекеттик мунай иштетүүчү заводдору (МИЗ) АКШ президенти Дональд Трамптын 100%дык тариф киргизүү боюнча коркутуусунан кийин Россиядан мунай сатып алууну токтотушту. Айрым дүйнөлүк маалымат каражаттарынын билдирүүсүнө ылайык, өткөн жумада Индия Россиянын чийки мунайы менен кызыкпай калышып, анын ордуна БАЭ менен Батыш Африкадан мунай ала башташты.
Индияда мунайды эң көп сатып алган компаниялар — жеке менчик компаниялар (Reliance Industries, Nayara Energy), бирок мунай иштетүү мүмкүнчүлүктөрүнүн 60%дан көбүн мамлекеттик МИЗлери көзөмөлдөйт, алар суткасына 5,2 миллион баррелге жетет.
Россия жооп кайтарды: «Трамптын коркутууларынан чыгабыз»
Мамдумадагы энергетика комитетинин төрага орун басары Игорь Ананских «Газета.Ru» басылмасына мындай деди:
«Албетте, жагымдуу жаңылык эмес. Бирок Трамптын кат түрүндөгү коркутуулары көпкө созулса, адамдар буга көнүп, көңүл бурбай калышат. Биз бир нече жылдан бери санкцияларда жашап келебиз. Россияга 30 миңге жакын санкция салынган — бул дүйнөдөгү башка бардык өлкөлөрдөн көп.
Энергоресурстарыбыз дүйнөлүк базарда атаандаштыкка жөндөмдүү. Логистиканы 2-3 айда өзгөртүп, сатуу көлөмүн сактап калабыз. Трамптын коркутууларынан чыгуу жолдорун табабыз».
Анын айтымында, Индиянын акыркы жылдардагы экономикалык өсүшү Россиянын арзан мунайынын негизинде курулган:
«Алар Европанын мисалын көрүп жатышат — Россиядан арзан энергоресурстар кеткенден кийин эмне болгонун билишет. Индияда да акылдуу адамдар бар, алар өз эли, өз мамлекетинин кызыкчылыгын ойлошот. Азыр алардын кору чоң жана жакын арада ошолорго таянышат».
Депутат кошумчалагандай, Трамп сунуштаган пошлиналар АКШнын өз экономикасына да зыян алып келиши мүмкүн:
«Жыл сайын бир нече өлкө БРИКСке кошулууну каалайт — бул өз ара санкцияларды кабыл албаган мамлекеттер биримдиги. АКШ муну 1930-жылдары да жасаган, ал убакта бул ички экономикалык кризиске алып келген. Эми бул пошлиналар жана санкциялар АКШнын өзүнө кандай таасир берери түшүнүксүз».
Трамптын коркутуусу
2025-жылдын 14-июлунда Дональд Трамп Россияга жана анын соода өнөктөштөрүнө 100% экинчи даражадагы пошлина киргизүүгө коркуткан. Ал Россияга Украинадагы согушту токтотууга 50 күн убакыт берген, бирок айдын аягында бул мөөнөттү 8-августка чейин кыскартты.
Трамптын айтымында, Россия мунай соодасы аркылуу чоң киреше табууда жана ал башка өлкөлөрдү бул продукцияны сатып алуудан баш тартууга мажбурлоону каалайт. Сенатор-республикачыл Линдси Грэм белгилегендей, Кытай, Индия жана Бразилия Россия мунайынын 80%ын сатып алышат.
Кытай буга каршы жооп берди:
«Энергетикалык коопсуздук боюнча Кытай өз улуттук кызыкчылыктарынан улам акылдуу чечимдерди кабыл алат. Салык согушунда жеңүүчү болбойт, коркутуу жана басым көйгөйлөрдү чечпейт», — деди Кытай ТИМинин өкүлү Го Цзякунь.
Индия Батышты сынга алды
Индиянын Улуу Британиядагы элчиси Викрам Дораисвами:
«Батыш мамлекеттери бизге Россия мунайынан баш тартууну талап кылып басым кылып жатышат, бирок өздөрү ошол эле учурда Россиядан сейрек кездешүүчү металлдарды сатып алууну улантышууда. Индия дүйнөдө энергияны эң көп керектеген үчүнчү өлкө жана керектөөнүн 80%дан ашыгын импорттойт. Россия мунайы болбосо, биздин экономика токтоп калышы мүмкүн».



















