Нигериянын батышындагы Нигер штатында катуу жааган жамгырдан кийин пайда болгон суу ташкыны кеминде 21 адамдын өмүрүн алды. Бул тууралуу штаттагы Өзгөчө кырдаалдар боюнча мамлекеттик агенттиги (SEMA) билдирди.
Агенттиктин башкы директору Ибрагим Хуссейнинин айтымында, табигый кырсык Мокова округуна чоң зыян алып келди. Курман болгондордун арасында балдар да бар. Анын айтымында, дагы 10 адам дайынсыз болуп жатса, көптөгөн тургундар жаракат алышкан.
Суу ташкынынын натыйжасында аймактагы инфраструктура жабыркап, болжол менен 50гө жакын турак үй суу алдында калды. Учурда издөө-куткаруу иштери уланууда.
Буга чейин Нигериянын Суу ресурстары министрлиги өлкөнүн бир катар аймактарында катуу жаан-чачын жана суу ташкыны болушу мүмкүн экенин эскерткен болчу.

















