Коомдук жайларда жүзүн толук жапкан (никаб кийген) 300гө жакын аялга эскертүүлөр берилди жана аларга мыйзамдын беренелери жазылган атайын китепчелер берилди.
Ош шаардык милициясынан билдиришкендей, 23-24-апрель күндөрү күч органынын кызматкерлери коомдук жайларда никаб кийип, жүзүн толук жаап жүргөндөргө түшүндүрүү иштерин жүргүзүшкөн.
Бул иш-чараны шаардык милицияда иштеген аял кызматкерлер, КР УКМКнын Ош облусу боюнча башкы башкармалыгынын, президентке караштуу Дин иштери жана улут аралык мамилелер боюнча агенттиктин жана Ош шаардык казыяттын аял кызматкерлери өткөрүшкөн.
Ушул айдын башында Жалал-Абад шаарында, Сузак районунун аймагында жана Ош облусунда никаб кийип, жүзүн толук жаап жүргөндөргө түшүндүрүү иштери жүргүзүлгөн. Укук коргоо органдары мыйзамды бузгандар айыпка жыгыларын эскертишкен.
Быйыл январь айында президент Садыр Жапаров “Дин тутуу эркиндиги жана диний бирикмелер жөнүндө” мыйзамга кол койгон. Ага ылайык, бетти толугу менен жабуучу беткаптар, диний кийимдер, жоолуктар, шлемдерди кийүүгө мүмкүн эмес. Ал эми үймө-үй кыдырып даабат айткандарга, коомдук жайларда жүзүн жашырган кийим кийгендерге 20 миң сом айып пул салына турган болгон.
Бул мыйзамдын аткарылышы тууралуу маалыматтар чыга баштаганда коомчулукта бир топ талкуулар жаралды. Буга президент Жапаров жооп кылып, бул бийликтин саясаты эместигин, бул Муфтияттын Кыргызстан мусулмандарына чийип берген эрежеси экенин айткан.
“Биз ошол мыйзамдын аткарылышына бийлик кайдыгер карап олтура бербей жардам беришибиз керек. Негизи эле кайсы гана маселе болбосун муфтияттын чыгарган фатвасынын аткарылышын камсыз кылганга жардам беришибиз керек»,-деген ал.






















