Баткен шаардык кеңешинин кезектеги сессиясында шаарды өнүктүрүүнүн Башкы планы бекитилди.
Бул тууралуу КР МинКабга караштуу Архитектура, курулуш жана турак жай-коммуналдык чарба мамлекеттик агенттигинен билдиришти.
Башкы планды талкуулоо маалында шаар куруу жана архитектура департаментинин директорунун орун басары Самат Иштыбаев жана Баткен облусунун архитектура жана шаар куруу башкармалыгынын башчысы Нурсултан Сатыбалдиев маалымат беришти.
Документ Баткен шаарынын келечектеги өнүгүүсүнө багытталган стратегиялык кадам болуп саналат. Анда шаар инфраструктурасын жакшыртуу, турак жай курулушун өнүктүрүү, транспорттук тутумду модернизациялоо жана башка негизги шаардык тармактарды өркүндөтүү боюнча пландар камтылган.
Башкы план Баткендин туруктуу жана тең салмактуу өнүгүүсүнө негиз түзөрү күтүлүүдө.
