Tesla Motors дагы бир жолу маанилүү кызматкеринен айрылды — компаниянын программалык камсыздоо боюнча директору Дэвид Лау жумушунан кетти.
Бул тууралуу Electrek басылмасы билдирип, Лау кесиптештерине өз чечими тууралуу кабар бергенин жазды.
«Дэвид Лау узак убакыт бою жогорку кызматта иштеп, Tesla’нын программалык камсыздоо боюнча жаңычыл ыкмалары аркылуу автоиндустрияда чыныгы өзгөрүүлөрдү жараткан. Tesla’га чейин унаалардагы программалык камсыздоо экинчи планга коюлуп, колдонуучу интерфейстер жөнөкөй болгон. Ал эми системаларды жаңылоо үчүн дилерге кайрылууга туура келчү», — деп жазат Electrek.
Баары 2012-жылы Tesla Model S чыккандан кийин өзгөрдү. Tesla унаалары смартфон сыяктуу алыстан жаңыланууга мүмкүнчүлүк алган. Чоң борбордук экран iPad’ды эске салган интуитивдүү жана жооп кайтаруучу интерфейс сунуш кылды. Tesla программасын сатуудан тартып кызмат көрсөтүүгө жана өндүрүшкө чейин толук интеграциялаган.
Бул жетишкендиктерде Дэвид Лаунун салымы чоң. Ал Tesla компаниясына 2012-жылы программалык камсыздоонун улук менеджери катары кошулган. 2014-жылы ал программалык камсыздоонун жана системалык интеграциянын директору болуп дайындалып, 2017-жылы программалык камсыздоо боюнча вице-президент болгон.
Анын кетүү себептери айтылган жок.
«Каалаган компанияда 12 жыл иштөө — бул чоң жетишкендик. Tesla’da бул өзгөчө эрдик. Дэвид Лау сөзсүз түрдө Tesla’га жана жалпы автоиндустриядагы программалык камсыздоонун өнүгүшүнө зор таасир тийгизди», — деп белгилейт Electrek.
Анын кетиши — Tesla үчүн олуттуу жоготуу. Акыркы жылы бир катар алдыңкы адистер жумуштан кеткен. Бул компаниядагы ири кыскартуулардан кийин болуп жатат.
Аны ким алмаштырары азырынча белгисиз. Ыктымал талапкерлердин бири — Майкл Рицкалла, ал унаалар үчүн программалык камсыздоо жана прошивка боюнча улук директор болуп 7 жылдан бери иштеп келет. Tesla көбүнчө жетекчилерди ички кадрлардан тандайт.
Мындан тышкары, Tesla’da жасалма интеллект багытында иш алып барган көптөгөн жетекчилер бар. Илон Маск акыркы мезгилде бул багытка артыкчылык берип жатканына байланыштуу, Дэвид Лау’нун милдеттери дал ушул бөлүмгө өткөрүлүшү мүмкүн.
