Өзбекстан Ооганстандан эч качан жүзүн бурган эмес жана коңшу өлкөгө болгон мамилеси ар дайым прагматикалык болуп келген, деди президент Шавкат Мирзиёев.
“Өзбекстандын Ооганстанга мамилеси ар дайым прагматизми жана узак мөөнөттүү стратегиялык багыты менен айырмаланып келген. Биз эч качан өзүбүздү өзүбүз жапкан жокпуз жана кошунабызга далыбызды бурган жокпуз. Биз Ооганстанды өнүктүрүү коңшу өлкөлөр, анын ичинде Өзбекстан менен конструктивдүү өз ара аракеттенүүсүз мүмкүн эмес деп эсептеп келгенбиз”, — деди президент Euronews телеканалына берген маегинде.
Мирзиёевдин айтымында, Өзбекстандын Ооганстанга карата саясаты менен макул болбогондордун көбү “бүгүн анын тууралыгын жана башка альтернатива жок экенин моюнга алууга аргасыз”.
“Биз Ооганстандагы мурунку режим бир катар жагдайлардан улам бийликти сактап кала албасына ишенгенбиз. Алардын арасында өлкөнүн бүткүл аймагына толук көзөмөлдү орното албагандыгы, оппозиция менен диалогго баргысы келбегендиги жана инклюзивдик өкмөт түзүүгө эч кандай каалоонун жоктугу, ошондой эле мурдагы бийликтин бардык деңгээлдеги ири масштабдагы коррупциясы болгон”, – деди ал.
Өзбекстандын башчысы азыркы жетекчилик Ооганстандагы кырдаалды турукташтырууга, өзүнүн ресурстарын инфраструктураны, анын ичинде аэропортторду, ички темир жол түйүндөрүн, суу-энергетикалык объекттерди өнүктүрүүгө, апийимдин түшүмүн кыскартууга багыттай алды деп эсептейт.
Ал Ооганстанды пайда болуп жаткан стратегиялык мүмкүнчүлүктөр призмасы аркылуу кароого чакырды. Анын айтымында, Ооганстанды эл аралык экономикалык процесстерге, анын ичинде өлкө аймагында инфраструктуралык долбоорлорду ишке ашыруу аркылуу тартуу “өтө маанилүү”.
“Ушул контекстте биз Евробиримдик жана башка эл аралык өнөктөштөр менен биргеликте Ооганстанга учурдагы кризистерден чыгууга гана эмес, узак мөөнөттүү келечекте да өнүгүүгө жардам бере турган оң күн тартибин жана демилгелерин бирге алдыга жылдырууга даярбыз. Биздин оюбузча, азыркы этаптагы негизги милдет – Ооганстанга билим берүү тармагында жардам берүүнү улантуу”, – деди президент.
Ал Ооганстандагы кырдаалды турукташтыруу жана аны калыбына келтирүү Борбор Азия өлкөлөрүнүн жана Евробиримдиктин жалпы кызыкчылыктарына жооп берерине ишеним билдирди.


















