Өзбекстан менен Австрия уюшкан эмгек миграциясы боюнча макулдашууну жол-жоболоштурууну пландап жатат.
Бул маалыматты Өзбекстандын министрлер кабинетине караштуу Миграция агенттигинин билдирүүсүнө таянып Podrobno.uz басылмасы жазды.
Аталган агенттиктин жетекчиси Бехзод Мусаев тышкы жана ички иштер министрликтеринин өкүлдөрү менен бирге сүйлөшүүлөрдү жүргүзүү үчүн Австрияга барды.
Чет элдик жумушчулар чөйрөсүндө өнөктөштүктү өнүктүрүү үчүн Австриянын Ички иштер министрлиги, Тышкы иштер министрлиги, Эмгек жана экономика министрлиги, Билим берүү, илим жана изилдөө министрлиги менен эки тараптуу бир катар маселелер боюнча талкуулар болду.
Сүйлөшүүлөрдүн негизги темасы австриялык компанияларга өзбек адистерин тартуу жөнүндө болуп, тараптар миграция жаатындагы өкмөттөр аралык макулдашуунун долбоорун иштеп чыгууну сүйлөшүштү.
Документ өзбекстандыктарды Австрияда жогорку маяналуу жумуштарга жайгаштырууга жана биргелешкен долбоорлорду ишке ашырууга негиз болот.
Мындан тышкары, апрель айында Ташкентте Австриянын соода-өнөр жай палатасынын өкүлчүлүгүн ачуу пландалууда. Ачылыш аземинде Австриянын негизги иш берүүчүлөрүнүн катышуусунда эмгек форуму болот.


















