2024-жылы Өзбекстанга чет өлкөдө убактылуу иштеп жүргөн 483 мигранттын сөөгү алынып келинген.
Бул маалымат өлкөнүн Миграция агенттигинин жетекчилигинин катышуусунда өткөн маалымат жыйынында айтылгандыгын “Gazeta.uz” басылмасы жазды.
Анда айтылган маалымат боюнча, аталган өлкөгө каза болгон жарандардын сөөгүнүн эң көбү Орусиядан – 474, Түркиядан -5, калган төртөө Корея менен Казакстандан келген.
Мындан тышкары Миграция агенттиги оор кырдаалга кабылган 775 кишини, алардан тышкары дагы 182 адамдын өз мекенине кайтып келүүсүнө жардам берген.
Ал эми аталган агенттиктин бөлүм башчысы Нигора Исроилова сөөктөрдү жеткирүүгө кеткен чыгымдар мамлекеттик бюджеттен каржыланганын жана кайсы мамлекеттен келгендигине жараша каржы сарпталарын айтты.
Анын билдиргенине караганда, “Жүк -200”гө 4000-5000ден баштап, 1000 АКШ долларга чейин акча жумшалат.
Белгилей кетүүчү жагдай, Өзбекстандан чет өлкөгө иштегени кеткен эмгек мигранттарынын саны 2025-жылдын башына карата 1 миллион 350 миң адамды түзгөн. Өткөн жылдын башында бул көрсөткүч 2 миллиондон бир аз ашып, мигранттардын саны 34%га кыскарды.
Өзбекстандан келген мигранттардын кызыгуусунун эң байкаларлык төмөндөшү Орусияда болууда. Эгерде 2024-жылдын башында 1,2 миллион адам иштесе, быйылкы жылдын башында бул көрсөткүч 698 миң жумушчуга кыскарган.



















