Өзбекстан мусулмандар башкармалыгы баш байгени – ажылык сапарга жолдомо менен Наманган облусундагы Хомиддин Кори мечитинин имам-хатиби Мухаммад Бобир Насриддиновго ыйгарды. Экинчи жана үчүнчү орунду ээлеген катышуучулар акчалай сыйлыктар менен сыйланышты.
13-ноябрда Өзбекстандын мечиттеринде иш алып барган имам хатибдердин жана ноибдердин (орун басарлар) катышуусунда “Жылдын имамы – 2024” сынагынын финалдык этабы болуп өттү. Мусулмандар башкармалыгынын маалыматы боюнча, Каракалпакстан Республикасы, облустар жана Ташкент шаарында өткөн тандоо баскычтарында 14 имам ат салышып, жеңишке жетишти.
Сынактын катышуучулары Курани Каримди окуу жана тафсирлөө, акыйда, фикх, ислам тарыхы, хадис таануу, уламалардын чыгармачылыгына байланыштуу суроолорго жооп беришти. Ошондой эле аткарылган иштердин жыйынтыгын жана жалпыга маалымдоо каражаттарында жарыяланган баяндамаларды көрсөтүштү.
Сынактын жыйынтыгы боюнча төмөнкү катышуучулар байгеге татыктуу деп табылды:
1-орун – 1-даражадагы диплом жана ажылык сапарга жолдомо Наманган облусундагы Хомиддин Кори мечитинин имам-хатиби Мухаммад Бобир Насриддиновго ыйгарылды;
2-орун – Ташкент шаарындагы Фирдавс мечитинин имам-хатиби Сатторов Бахтиер, 2-даражадагы диплом жана 16 млн сом акчалай сыйлык;
3-орун – Ташкент облусунун “Чанок” мечитинин имам-хатиби Бухарбаев Ёкуб 3-даражадагы диплом жана 13 миллион сом акчалай сыйлык менен сыйланды.
Ошондой эле, «Жылдын эң жан мыкты имамы» сыйлыгын Каракалпакстан Республикасынын «Мулла Исхок» мечитинин имамы Алтынбек Зинуллаев жана Хорезм облусунун «Мирхошим бобо» мечитинин имамы Оллаберган Гойипов алышты.
Сынактын жыйынтыгында Өзбекстан мусулмандар башкармалыгынын төрагасы, муфтий шейх Нуриддин Холикназар “Жылдын имамы – 2024” сыйлыгынын жеңүүчүсүнө ажылык сапарга жолдомо тапшырып, жакшы каалоо-тилектерин айтты. Мелдештин бардык катышуучуларына баалуу белектер берилди.
Сүрөт: Өзбекстан мусулмандар башкармалыгы
