Чет элдик басылмаларда тараган Орусиянын президенти Владимир Путин менен АКШнын жаңыдан шайланган лидери Дональд Трамптын телефон аркылуу сүйлөшүүсү тууралуу маалымат жалган.
Бул тууралуу орус президентинин басма сөз катчысы Дмитрий Песков бүгүн маалымат жыйынында билдирди.
“Эч кандай сүйлөшүү болгон эмес. Бул таптакыр жалган, бул таза фантастика”,-деди Песков.
Ал “Вашингтон Пост” жана “Рейтерс” гезиттери тууралуу айтып: “бул – кээде, урматтаган, кадыр-барктуу маалымат каражаттары жарыяланган кабарлардын сапатынын ачык мисалы” деп мүнөздөдү.
Буга чейин америкалык аталган басылмалар Путин менен Трамп Украинадагы кырдаалды жана Европа континентиндеги тынчтыкты талкуулашканы тууралуу маалыматтар тараган.
Кремлдин сайтында айтылгандай, Путин менен Трамптын ортосундагы акыркы телефон сүйлөшүүсү 2020-жылдын июль айында болгон (ошол айларда Трамп биринчи президенттик мөөнөтүн аяктап жаткан). Анда стратегиялык туруктуулукту камтыган түрдүү эл аралык маселелер талкууланган.
Путин менен Трамп көптөгөн саммиттерди бирге өткөрүштү. Тактап айтканда, 2018-жылдын июль айында Хельсинкиде Орусия-АКШ саммити өтүп, анда лидерлер жекеме-жеке жана делегациялардын катышуусунда баарлашкан.
Путиндин АКШ лидери менен акыркы телефон сүйлөшүүсү 2022-жылдын 12-февралында болгон. Анда ал Жо Байден менен бир сааттан ашык сүйлөшүп, негизги темалар Орусия үчүн коопсуздук кепилдиктери жана Украинанын тегерегиндеги кырдаал болгон. Ошондой эле Москва менен Вашингтондун ортосундагы эки тараптуу мамилелер тууралуу да сөз болгон.
АКШда президенттик шайлоо 5-ноябрда өттү. Трамп шайлоочулар коллегиясынын зарыл болгон 270тен көп добушун алып, атаандашы, Демократиялык партиянын талапкери Камала Харристен озуп чыгып, өлкөнүн 47-президенти болуп шайланды.














