Сауд Арабиянын тышкы иштер министри Фейсал бин Фархан Аль Сауд Израилдин соккусун Ирандын эгемендигин жана аймактык бүтүндүгүн бузуу деп атап, туруксуздуктун жайылышын алдын алуу үчүн аймактагы өлкөлөр биргелешип аракет кылышы керек деди.
Tasnim агенттигинин маалыматына ылайык, ал бул тууралуу дүйшөмбү күнү Ирандын тышкы иштер министри Аббас Арагчи менен телефон аркылуу сүйлөшүүсүндө билдирди, алар ошондой эле акыркы аймактык окуяларды талкуулашты.
Белгиленгендей, Ирандын Тышкы иштер министрлигинин башчысы мусулман өлкөлөрүн Израилдин Газа жана Ливандагы аракеттерин токтотууга багытталган аракеттерди координациялоого чакырып, Израилдин Иранга жакында жасаган соккусун айыптаган Сауд Аравиясына ыраазычылык билдирди.
Белгилей кетүүчү жагдай, буга чейин Сауд Аравиянын ТИМи Израилдин Иранга чабуулун айыптап, аны эл аралык мыйзамдарды жана Ислам республикасынын эгемендигин бузуу деп атаган.
“Сауд Аравия Королдугу Иран Ислам Республикасына жасалган аскердик чабуулдарды айыптайт, бул анын эгемендигин жана эл аралык мыйзамдарын бузуу болуп саналат. Королдук чөлкөмдөгү өлкөлөрдүн жана анын элдеринин коопсуздугуна жана стабилдүүлүгүнө коркунуч туудурган эскалациянын уланышын жана чыр-чатактын кеңейишин кабыл албоо боюнча өзүнүн бекем позициясын дагы бир жолу ырастайт”, – деп айтылат билдирүүдө.
Сауд Аравиянын Тышкы иштер министрлиги ошондой эле Жакынкы Чыгыштагы абалдын курчушунун терс кесепеттерин эскертип, жаңжалдын тараптарын максималдуу сабырдуулукка чакырды.
«Королдук эл аралык коомчулукту жана чыр-чатакка катышкан тараптарды эскалацияны басаңдатуу жана аймактагы чыр-чатактардын кесепеттеринин алдын алуу жана жумшартуу боюнча милдеттенмелерин аткарууга чакырат», – деп кошумчаланат билдирүүдө.
Андан мурда йемендик “Ансаруллах” кыймылы (хуситтер) сионисттик режимдин Иранга каршы ишке ашпай калган агрессиясын айыптаган билдирүү жасап, аны эл аралык мыйзамдарды бузуу деп атаган.
26-октябрга караган түнү Израиль армиясы (ЦАХАЛ) Ирандын Тегеран, Хузестан жана Илам провинцияларындагы бир нече аскердик объекттерге сокку урган. Ирандын абадан коргонуу системасы ракеталардын көбүн кармап, кээ бир объекттерге чектелүү зыян келтирилген. Натыйжада Ирандын 4 жоокери каза тапкан.


















