Кыргызстандын президентинин администрациясынын тышкы саясат бөлүмүнүн башчысы Муратбек Азымбакиев Нью-Йорк шаарында БУУнун Башкы ассамблеясынын 79-сессиясынын Жогорку деңгээлдеги жумалыгынын талаасында бир катар чет өлкөлүк делегациялардын башчылары жана өкүлдөрү менен жолугушту. Бул тууралуу президенттин администрациясынан билдиришти.
М. Азымбакиев Вануатунун премьер-министри Шарлот Салвай Табимасмас, Папуа Жаңы Гвинеянын премьер-министри Джеймс Марапе, Сент-Винсент жана Гренадинин премьер-министри Ральф Гонсалвес, Гренаданын премьер-министри Дикон Митчелл жана Сент-Люсиянын тышкы иштер министри Альва Романус Баптист менен жолугушууларды өткөрдү.
Тышкы саясат бөлүмүнүн башчысы 2027-2028-жылдарга БУУнун Коопсуздук Кеңешинин туруктуу эмес мүчөлүгүнө Кыргызстандын талапкерлигин көрсөтүү, шайланган учурда БУУнун Коопсуздук Кеңешиндеги өлкөнүн пландары жана артыкчылыктары тууралуу маалымат берип, аягында аларга президент Садыр Жапаровдун алдыдагы шайлоодо Кыргызстандын талапкерлигин колдоо боюнча өтүнүч-катын тапшырды.
Мындан тышкары, Муратбек Азымбакиевдин ККП БКнын Саясий бюросунун мүчөсү, ККП БКнын тышкы иштер боюнча комиссиясынын канцеляриясынын башчысы жана Кытайдын тышкы иштер министри Ван И менен Малайзиянын тышкы иштер министри Мохамад Хасан жана Ватикандын Мамлекеттик катчысы кардинал Пьетро Паролин жана башка расмий өкүлдөр менен жолукту.
Баарлашуунун жүрүшүндө тараптар Кыргызстан менен Глобалдык фонддун террордук коркунучтарга каршы туруу жана зомбулук экстремизмдин алдын алуу жаатында кызматташуу маселелерин талкуулашты.


















