Индиянын чыгышындагы Бихар штатындагы Жеханабад шаарына жакын жердеги храмда тепсенди болуп, кеминде жети киши каза болуп, 35и жараат алды.
Бул тууралуу ТАСС агенттиги жергиликтүү бийликтерге шилтеме берип кабарлады.
Каргаша жекшемби күнү кечинде жүздөгөн динчилдер ибадатканага Шива кудайына арналган салттуу аземдерге чогулган учурда болгон. Шаардык полициянын инспектору Дивакар Кумар Вишвакарма жети өлүк – үч аял жана төрт эркек – Жеханабаддагы өлүк бөлүмдөрүнө алынганын ырастады. Калк тепсендиге элди көзөмөлдөө үчүн күч колдонуудан улам келип чыккандыктан, өлгөндөрдүн чыныгы саны көбүрөөк деп кооптонууда.



















