Мусулмандардын ыйык Рамазан айынын урматына өлкөбүздүн бир катар мечиттеринде кайрымдуулук иш-чаралары өткөрүлүп, калктын аярлуу катмарына азык-түлүк түрүндө жардам баштыкчалары таратылууда. Бул тууралуу Муфтияттын маалымат кызматы билдирди.
Андагы маалыматка ылайык, орозонун алгачкы күндөрү Ош облусуна караштуу Кара-Суу районундагы жалпы мечиттерде кайрымдуулук иштерин уюштуруу башталып, күн сайын ар кайсыл мечиттерде өткөрүлүүдө.
Бул жолкусунда Нариман айыл өкмөтүндөгү «Абдуллах бин Умар» мечитинин имам-хатиби Олимжон Мамадаеповдун демилгеси менен 30 үй-бүлөгө жардам баштыкчасы таратылды. Жардам баштыкчасында 50 кг ун, 5 литр май, 2,5 кг күрүч, кой эти, тоок эти, курма, 30 кг картошка, 30 кг сабиз, 10 кг пияз камтылган. Кайрымдуулуктун жалпы суммасы 196800 сомду түздү.
Ошол эле учурда Шарк айыл өкмөтүндөгү «Имам-Ата» мечитинин имам-хатиби Юсуфхан Ахматалиевдин демилгеси менен 10 үй-бүлөгө жардам баштыкчасы таратылды. Андагы жардам баштыкчасында 10 кг ун, 10 кг макарон, 5 литр май, 1 коробка печенье, 15 даана жумуртка, 5 кг пияз, 5 кг сабиз, 5 кг картошка, күрүч, гречка, туз, кум шекер ж.б. керектелүүчү азыктар камтылган. Кайрымдуулуктун жалпы суммасы 36000 сомду түздү.
«Рамазан айына карата райондогу жалпы имамдарыбыз кайрымдуулук жаатында алгылыктуу аракеттерди жасоодо. Колунда бар инсандарды мал-мүлкүн той-аштарда ысырап кылбастан, кайрымдуулук иштерине колдоо көрсөтүүсү боюнча түшүндүрүү иштери жүрүп жатат», — деди баш имам-хатиб райондук Абдирашит ажы Батыров.
Ошондой эле Ноокат районунун баш имам-хатиби Бекназар ажы Жапаров да райондогу жалпы имамдар кайрымдуулук иштерин уюштурууну баштаганын билдирди. Алгачкылардан болуп, «Жоме» мечити жана «Молдо Якуб» мечитинин имамдарынын демилгеси менен 300 үй-бүлөгө жардам баштыкчасы таратылды.
Жардам баштыкчасында тамак жасоо үчүн керектелүүчү азыктардын баары камтылып, бир баштыкча 5500 сомду түздү. Жалпы суммасы 1 650 000 сом болуп, «Хадия Ноокат» фонду тарабынан элден чогултулган. «Молдо Якуб» мечитинин имамы Тажимамат Артикмаматов каражатты чогултуу жана азык-түлүк сатып алуу иштеринин башында туруп, чоң салым кошконун хатибияттан маалымдашты.
Ноокат райондук хатибияты жалпы имамдарга кайрымдуулук иштерин уюштуруу боюнча тапшырма берилгендигин айтып, мындай сооптуу иштер тез-тез өткөрүлүп турарын билдиришти.
Демилгени Кемин районунун баш имам-хатиби Куттубек ажы Дуйшебаев жана Белек ажы Керимов, Нурали Абдылдаев колго алып, «Аттаун» фонду менен биргеликте ишке ашырылды.
«Рамазан берекенин, берешендүүлүктүн, жакшылыктын айы. Бул айда мүмкүнчүлүк болуп турса, өзүбүзгө эле эмес өзгөгө да көңүл буруу зарыл. Анткени Аллахтын Элчиси (с.а.в.) адамдардын ичинен эң берешени болгон жана Рамазан айында өзгөчө берешендикти көрсөтчү. Мына ошондуктан жакшылык иштерде жарышып калалы», — деп билдирди баш имам-хатиб Куттубек ажы Дуйшебаев.


















