Өзбекстан Россиянын Сибирь аймагынан дарыяларды буруп келип, сугат сууга болгон тартыштыкты чечүүнү пландаштырууда.
Чындыгында акыркы мезгилде Борбор Азия өлкөлөрүндөгү кургакчылыкка байланыштуу чөлкөмдөгү чөлдүү жана суусу аз, кирешеси негизинен дыйканчылыктан алынган Өзбекстандын бийлиги өтө тынчсызданып, бул көйгөйдү чечүүнүн ар кандай жолдорун издөөдө.
Анын бири катары Россиянын Сибирь аймагынан дарыяларды буруп келүү варианты каралууда.
Көпчүлүк адистер Об жана Иртыш дарыяларынын бир бөлүгүн буруп келүү Өзбекстандагы суу көйгөйүн чечет деп ойлошот. Бирок Ma’no изилдөө демилге борборунун директору Бахтиёр Эргашев башкача жолду сунуш кылууда.
Анын пикиринде, Өзбекстанда суу үнөмдүү пайдаланылбайт: суу ресурсунун болгону 5%ы элдин керектөөсүнө жумшалып, 90%ы айыл чарба жерлерин сугарууга колдонулат. Бул суунун максатсыз колдонулушуна жана жер кыртышынын тузга толушуна алып келет.
Эргашев ошондой эле тамчылатып сугаруу системасын, күн жана шамал станцияларын суу агымына курууну колго алуу максатка ылайыктуу болот деп эсептейт. Ал эми чоң чыгымды талап кылган каналдардын ордуна Сибирден чоң диаметрдеги куурларды курса, бул сууну транзит кылуудагы жерге сиңип кетүүдөн да сактайт.
Белгилей кетүүчү жагдай, Сибирдин дарыяларын Өзбекстандын аймагына буруп келүү демилгеси СССРдин учурунда да көтөрүлүп, бирок адистер бул планга өтө көп каражат талап кылынгандыктан жана экологиялык баланстын бузулуусуна алып келиши мүмкүн деген тыянагынан кийин токтоп калган.
