2010-жылдын июнь окуясында Жалал-Абад шаарындагы массалык башаламандыктарды уюштургандардын лидерлери жана уюштуруучулары УКМК тарабынан кармалды.
Кармалган жарандын бири Сузак районунун Таш-Булак айылынын тургуну болгон. Ал 2010-жылдын июнь айында Жалал-Абад облусунун Сузак районунун аймагында массалык баш аламандыктарды уюштурууга активдүү чакырып, жолдорду тосууну, тосмолорду орнотууну, сепаратисттердин көзөмөлүндөгү аймактардан чыгып кетүүгө аракет кылган жөнөкөй жарандарга кол салууларды уюштурган мыкаачы топтордун лидерлеринин бири болгон.
Мындан тышкары сепаратисттик иштерге тиешеси бар дагы бир жаран жөнүндө маалыматтар табылган. Ал 2010-жылдагы июнь окуясында Сузак районундагы “Круговое” деп аталган жер тилкесине жооптуу болгон. Анын жашаган жеринде тинтүү учурунда: 6,5мм калибрлүү 1 – “SAKO TRG-22” снайпердик мылтык, “Prazise Jagen” оптикасы жана “Pulsar” түнкү көрүү аппараты менен, 1 – “SAUER 101” карабини, 1 – 12 калибрдүү жылмакай көздүү курал “FABARM XLR”, ошондой эле алар үчүн 76 даана ок табылып алынган.
Белгилей кетүүчү жагдай, 2010-жылы июнь айында Кыргызстандын түштүк аймагында орун алган улуттар аралык жаңжалдын кесепетинен 500гө жакын адамдын өмүрү кыйылып, 50дөн ашык адам дайынсыз жоголуп кеткен. Мындан тышкары жүздөгөн жеке адамдардын үйлөрү өрттөлгөн. Мамлекетке келтирилген материалдык чыгым 3 млрд. сомго жакын болгон.

















