Көзүм менен көргөндү, алдын ала “кулак кагыш” кылып койбосом болбойт. Бул нерсе өтө чоң элдин наразычылыгын жаратууда.
Кечее, 18-19-Сентябрь күндөрү Оштун бир канча Казахстандан ун алып келип саткан кампалары ундун баасын туптуура 25% га көтөрүшүптүр. Тагыраагы: буга чейин 50 кг ун, дүң баада, орточо 2100 сомдон сатылса, дароо 2800 сомдон сатыла баштаптыр. Бир күндө 700 сом кошулуп кетиптир.
Соодагерлер бул кымбаттоону: Казахстандан ун келбей жаткандыгы менен түшүндүрүп жатышыптыр.
Ундун кымбатташы менен Навайчылар нандын баасын көтөрүштү. Дүкөндөрдө буга чейин 20-25 сомдон сатылып жаткан нандар, кечетен баштап 30-35 сом болуп калды.
Бул өтө коркунучтуу кырдаал туугандар! Коомдук транспорттордон пайдалануу үчүн жол кирени 5 сомго кымбаттатканда эл канча ызы-чуу болду эле, эми бир нанды 10 сомго дароо кымбатташы, өтө чоң наразычылыкты жаратпай койбойт.
Коомдук транспорттон адам күнүгө бир же эки жолу гана пайдаланат. А ар бир орточо кыргыз үй-бүлөсү күнүгө жок дегенде төрттөн нан керектейт.
Эң жаманы эл будуң-чаң болуп толкуп, мүмкүнчүлүгү барлар кампалардагы ундун баарын талап кетишип, ортодо чоң жетишпестик пайда болуп, баа мындан да бир нече пайызга жогорулашы мүмкүн.
Бийлик башчылар, элди алдап өзүңөрдү мактап, ал жалганыңарга өзүңөр да ишенип алып, жыргап жата бербей кыймылдагыла. Жалганыңарга элдин кулагы канышы мүмкүн, бирок курсагы тойбойт! Бир жактан электр жарыгын өчүрсөңөр, экинчи жактан нан кымбаттап, кымбаты да жок болуп атса, эл азыр мындайга чыдабайт.
Ошондуктан Токаев братка чуркагыла. Бутун кучактап жалдырасаңар дагы эптеп унду үзгүлтүксүз жеткирип берип туруусун камсыздагыла. Антпесеңер ахвалыңар оор болуп калат. А ал кишиге жалынбаш үчүн үч жылдан бери мактанып коюп, жыргап олтура бербей айыл чарбаны көтөрүп, дан азык жактан көз карандысыздыка жеткирип коюшуңар керек эле мамлекетти.
Нан проблемасын чечкиле нан проблемасын, Сингапур болуп кеткенди анан көрө жатаарбыз…
Асамиддин Мухиддинов.
(макала автордун Фейсбуктагы барагынан алынды жана өзгөртүүсүз берилди).



















