Өткөн жылдын март айынан тарта Кыргызстандын мурдагы жарандары, алардын балдары жана неберелери мекендеш макамын алуу үчүн арыз берүүгө укукка ээ болушкан.
Бул тууралуу Эмгек, социалдык камсыздоо жана миграция министрлигинин басма сөз кызматы билдирди.
Бул “Мекен-карт” документи Кыргызстандын аймагына тоскоолдуксуз кирүүнү жана калууну, билим берүү жана медицина кызматтарынын жеткиликтүүлүгүн, уруксат берүүчү документтерди жол-жоболоштурбастан эмгек ишмердүүлүгүн жүргүзүү мүмкүнчүлүгүн жана башка көптөгөн укуктарды камсыз кылат.
Маалыматта белгиленгендей, арыздарды кароо мөөнөтү жалпы тартипте 3 айга жакын жана жөнөкөйлөтүлгөн тартипте 1,5 айды түзөт. Эгерде Кыргызстандын жарандыгынан чыккан учурдан тартып, алты айдан ашпаган убакыт өтсө, анда чет өлкөлүк жарандар жөнөкөйлөштүрүлгөн тартипте расмий өтүнүч менен кайрылууга укуктуу.
Эскерте кетсек, «Мекен – карт» улуттук демилге иштей баштагандан бери 187 арыз түшүп, анын ичинен 150 арыз кабыл алынып, алардын ичинен үстүбүздөгү жылдын башынан бери – 97 өтүнүч канааттандырылган.



















