Ак үй Украинага курамында кемитилген ураны бар танктын снаряддарын берүүнү жактырганы жатат.
Бул тууралуу америкалык аткаминерлерге шилтеме берүү менен Wall Street Journal басылмасы жазганын РИА Новости маалымдады.
“Байдендин администрациясы АКШ Киевге берип жаткан Abrams танктарын кантип жабдуу боюнча бир нече жумалык ички талкуулардан кийин Украинага кемитилген ураны бар снаряддарды берет деп күтүлүүдө”, – деп жазат басылма.
Аткаминерлердин биринин айтымында, азыркы учурда кемитилген ураны бар куралдарды Украинага жөнөтүүгө уруксат берүү үчүн эч кандай олуттуу тоскоолдуктар жок. Бирок Ак үйдөгү айрым аткаминерлер адам ден соолугуна жана айлана-чөйрөгө коркунуч туудурган мындай снаряддардын Киевге берилиши Вашингтондун сынга кабылышына алып келет деген тынчсызданууларын билдиришүүдө.
Эске салсак, март айында Улуу Британия “Челленджер-2” танктары менен бирге Украинага курамында кемитилген ураны бар курал берүү ниети бар экенин жарыялаган. Россиянын президенти Владимир Путин бул демилге тууралуу айтып жатып, Батыш “Россия менен акыркы украиналыкка чейин сөз жүзүндө эмес, иш жүзүндө согушууга ниеттенип жаткандыгынан кабар берет” деп билдирген.
Ал эми Тышкы иштер министри Сергей Лавров эгер Британия Киевдин режимине мындай куралдарды жеткирсе анын аягы Лондон үчүн жаман болорун билдирген.
ТИМдин расмий өкүлү Мария Захарова мындай куралды колдонуу ошол аймакта жашап жаткандарга карата геноцид жасоо болуп саналарын билдирген. Ал уран кошулган куралдардын бул түрү жөнөкөй курал-жарактардан алда канча күчтүү жана адамдын ден соолугуна терс таасир этерин билдирип, андан куралды колдонгон адамдар дагы жабыркап, жер ууланып, анда жашаган муунга кесепетин тийгизерин баса белгилеген.
Кемитилген ураны бар курал-жаракты колдонуунун кесепеттери
Курамында кемитилген ураны бар курал-жаракты колдонууда андан өтө уулуу жана зыянсыздандыруу мүмкүн болбогон радиоактивдүү чаң басырылып, онкологиялык ооруларды пайда кылышы мүмкүн.
Кемитилген уран биринчи жолу Фашисттик Германияда вольфрамдын жетишсиздигинен улам танктардын снаряддарында колдонулган. Андан кийин мындай ок-дарылар АКШнын армиясына 1970-жылдары кирген. Кемитилген уран америкалык аскерлер тарабына биринчи жолу 1991-жылы Перс булуңундагы “Чөлдөгү бороон” операциясы учурунда, 1999-жылы Югославияны бомбалоодо, 2003-жылы Иракка киргенде жана башка аскердик кагылышууларда колдонгон.
АКШдагы Колорадо тоо мектебинин изилдөөчүсү Суад Аль-Аззави Штаттардын Иракта ак фосфорду жана кемитилген уранды колдонуусу бул жерде рак оорусунун алты эсе көбөйүшүнө алып келгенин билдирген.
АКШдагы Колорадо тоо мектебинин изилдөөчүсү Суад Аль-Аззави белгилегендей, Штаттар Иракта ак фосфорду жана кемитилген уранды колдонуусу бул жерлерде рак оорусунун алты эсе көбөйүшүнө алып келгенин билдирген.
