Ооганстандын чыгышында болгон жер титирөөдөн кийин 500 миңге жакын жаранга медициналык жардамга муктаждык жаралгандыгын Дүйнөлүк саламаттыкты сактоо уюму билдиргендигин ТАСС агенттиги жазды.
“498 000ден ашуун адам медициналык жардамга муктаж, анын ичинде 11 600дөн ашуун кош бойлуу аялдар. Учурда алар санитардык абалы начар убактылуу баш калкалоочу жайларга толгон”, – деп айтылат маалыматта.
Уюмдун билдирүүсүнө ылайык, лагерде аялдар үчүн бөлүнгөн атайын жер жок. Алар ооруканаларда жабыркагандардын 35 пайызын түзүшөт.
Ал эми БУУнун агенттиги болгон Эл аралык миграция уюму өлкөдөгү соңку жер титирөөдөн кийин жардамдын көлөмүн көбөйтүүну чечти. Жабыркаган 134,000 адамга жардам берүү үчүн 16,8 миллион доллар керектелет. Алардын көбү үйлөрүн таштап кетүүгө аргасыз болгондуктан баш калкалоочу жай, чатыр, жууркан жана негизги буюмдар керек. Ошондой эле саламаттыкты сактоого, психосоциалдык колдоого, таза сууга жана гигиенага жетүүгө муктаж. Аялдар менен кыздар мындай шарттарда, анын ичинде купуялуулуктун жоктугунан улам көбүрөөк коркунучка кабылышат.
“Үй-бүлөлөр бардыгын жоготушту жана азыр баш калкалоочу жайы, тамак-ашы жана таза суусу жок ачык жерде уктоого аргасыз болушту”, – деди Эл аралык миграция уюмунун директорунун орун басары Угочи Дэниелс.
Анын айтымында, жабыркаган оогандыктарга тез арада жардам көрсөтүлбөсө, кыш жакындаган сайын абалдары начарлай берет.
Угочи Дэниелс мындан тышкары Ооганстан буга чейин эле көптөгөн кыйынчылыктарга туш болгондугун, анын ичинде 2025-жылы Иран менен Пакистандан 1,7 миллиондон ашык оогандыктардын кайтып келиши жана экономикалык кризиске кабылгандыгын эске салды. Ал кошумчалагандай, бул өлкөгө тийиштүү каражат бөлүнбөсө, миллиондогон адамдар колдоосуз калышат.
Эске сала кетсек, Ооганстанда 31-августта күчү 6 баллга жеткен жер титирөө болуп, олуттуу зыян келтирген.
4-сентябрда күчү 6,2 баллга жеткен экинчи жер титирөө дагы кыйроого алып келип, негизги жолдорго таш кулап, жабылып калган.
Үй-бүлөлөр бардык мүлкүнөн ажырап, азыр баш калкалоочу жайы, тамак-ашы жана таза суусу жок ачык жерде уктоого аргасыз болушууда.



















