Жалал-Абад облусунда ири жашылдандыруу кампаниясы башталды. Анын алкагында, облустагы 100 гектар аянттагы какыраган адырларга жаңгак, фисташка, бадам, алма, карагай, өрүк сыяктуу жети түрдөгү 40 миң көчөт отургузулууда.
Бул иш-чара Садыр Жапаров демилгелеген «Жашыл мурас» улуттук программасынын алкагында өтүп, ага УКМК төрагасы Камчыбек Ташиев колдоо көрсөткөн.
Бул тууралуу билдирген ӨКМ маалымат кызматы бул иш-чара өлкөдөгү экологиялык демилгелердин бири катары аймактагы экологиялык абалды жакшыртууну жана келечек муундар үчүн жагымдуу чөйрө түзүүнү көздөй турганын кабарлады.
Долбоорду жүзөгө ашырууга Өзгөчө кырдаалдар министри Бообек Ажикеев баш болгон министрликтин өкүлдөрү, УКМКнын кызматкерлери жана токой чарбасынын адистери катышты.
Жашылдандыруу долбооруна заманбап технологиялар дагы тартылып, көчөттөрдүн өсүшүн камсыздоо максатында Израилден алынып келинген тамчылатып сугаруу системасы орнотулууда. Аталган система Түркиядан келген адистер тарабынан ишке ашырылып, көп жылдык пайдаланууга ылайыкташтырылат.
Ошондой эле, узак мөөнөттүү келечекте бул токой массивдери аймактагы экологиялык кырдаалды жакшыртып, мөмө-жемиш берүүчү бактардан жергиликтүү тургундар пайдалана алат. Мындан тышкары, долбоор Жалал-Абад облусунда экотуризмди өнүктүрүүгө дагы өбөлгө түзөөрү айтылды.
Белгилей кетсек, Кыргызстанда жашылдандыруу ишине 2022-жылдан бери өзгөчө көңүл бурулуп келет. Президент Садыр Жапаровдун атайын жарлыгынын негизинде башталган «Жашыл мурас» улуттук кампаниясынын алкагында, өлкөнүн бардык аймактарында 2000 гектардан ашык токой массивдери отургузулат жана негизги автомагистралдардын боюнда жашыл аллеялар түзүлөт.



















