Бүгүн, 3-сентябрда, Жалал-Абад шаарынын мэри Эрнисбек Ормоков шаардык кеңештин сессиясында калаанын атын Манас шаары деп өзгөртүү сунушун берди.
Мэриянын маалымат кызматы кабарлагандай, аталган сунушту депутаттар бир добуштан колдоп беришти. Эми шаардын атын өзгөртүү боюнча мыйзам долбоору Жогорку Кеңеште каралып, мыйзамга президент кол койгондон кийин күчүнө кирет.
Шаардык мэриянын маалыматына ылайык, бул шаардын түзүлгөндүгү жөнүндө расмий документтерде 1877-жылы октябрь айы деп көрсөтүлгөн. Башкача айтканда, бул жылы Жалалабат – шаар статусуна ээ болгон. Калаа 1924-1926-жылдары округдун, 1926-1928-жылдары аймактык административдик, 1939-1959-жылдары облустун борбору болгон.
Ал эми 1991-жылдан баштап Жалал-Абад облусунун борбору болуп саналат. Депутаттардын Жалал-Абад шаардык Кеңешинин 2007-жылдын 8-августундагы кезексиз XXIX сессиясынын № 2 токтому менен Жалал-Абад шаарынын эмблемасы менен туусу бекитилген.
1926-жылы Жалал-Абад шаарында 9657 адам болуп, алардын 1200ү сабаттуу болгон. 2017-жылдагы эл каттоонун жыйынтыгында шаардын калкынын саны 159 997 адам деп көрсөтүлгөн.



















