2023-жыл – Жалал-Абад шаары үчүн ийгиликтүү жылдардан болуп, көп тармакта динамикалуу өсүү темпи байкалды. Бул тууралуу калаа бийлигинин маалымат кызматынын жетекчиси Кабылбек Көчкөнбаев билдирет. Анткени калаада бир жыл ичинде жаңы салынган жана кеңейтилген жолдор, чакырымдарга созулган тратуарлар пайдаланууга берилди. Булардан сырткары, ооруканалар жаңыланып, билим берүү тармагы менен спортко өзгөчө көңүл бурулган. Ал эми бир канча балдар бакчалары, IT академиясы, Олипиадалык резервдеги республикалык колледж ачылуу алдында турса, бюджетти толтурууга багытталган өндүрүштүк ишканалар пайдаланууга берилген.
Булар – Жалал-Абад шаарын өнүктүрүү үчүн Республикалык бюджеттен бөлүнгөн 2 млрд сомго аткарылган.
Жалал-Абад шаарынын жолдоруна өзгөчө көңүл бурулган
Жалал-Абад шаарынын жергиликтүү бийлиги калааны өнүктүрүүгө бөлүнгөн 2 млрд сомду 3 категорияга бөлгөн. Анда аткарылат делген жумуштардын ичинде шаардын жолдоруна өзгөчө маани берилген. Тактап айтканда, айдоочулар менен жүргүнчүлөргө жакшы шарт түзүү максатында, айрым негизги жана ички жолдор кеңейтилген. Шаардагы 3,5 чакырымдык борбордук көчөсү толугу менен оңдоп-түзөөдөн өтүп, ага Түмөнбай Байзаков проспектиси ат ыйгарылды. Дагы бир негизги көчөлөрдүн бири болгон Пушкин көчөсү да мурунку калыбынан 100 пайызга өзгөрүп, жаңыдан асфальт төшөлдү.

Мындан сырткары, калаанын бир катар негизги көчөлөрү – Бекмамат Осмонов, Даниельбек Малашев, Манас, М.Бабкин, Курманбек атындагы бир канча көчөлөр да кеңейтилип, жаңыдан асфальт төшөө, тротуар куруу, темир-бетон арык куурларын жаткыруу, жарыктандыруу жана жашылдандыруу иштери жасалды. Жалпысынан 2 млрд. сомдун эсебинен жогорудагы жолдорду реконструкциялоо үчүн 583 млн 500 миң сом акча каражаты жумшалган.
Ошондой эле, калаадан “Жалал-Абад” санаториясына чейинки узундугу 3,6 чакырым жолго 28 млн 800 миң сом коротулуп, тротуар салынды жана ал жарыктандырылды. Алдыда жол четине атайын отургучтарды орнотуу иши калган.
Социалдык обьекттердин курулушу
Буга чейин Жалал-Абад шаарынын аймагында ооруканалардын эскилиги жеткен имараттары да чоң көйгөй жаратып келген. Тагыраагы, калаадагы облустук клиникалык оорукананын терапия, неврология жана жасалма бөйрөк бөлүмдөрүнүн авариялык абалдагы имараттары буздурулуп, анын ордуна 100 орундуу, 3 кабаттан турган заманбап-жаңы корпус курулду. Оорукананын курулушуна 251 млн сом акча каражаты жумшалган.
Бул ооруканадан сырткары, дагы бир 3 кабаттуу заманбап оорукана салынды. Тактап айтканда, калаанын Темир жол көчөсүндө жайгашкан облустук кургак учукка каршы күрөшүү борбору да жаңы имараттуу болду. Бейтапкана 96 орунга ылайыкташтырылып, бардык шарттар каралган. Ага 264 млн. сомдон ашуун акча каражаты сарпталган.
Жаш балдар үчүн жылдын төрт мезгилинде тең пайдалана турган муниципалдык балдар ойноочу комплекс да курулду. Ал компалекс балдарды заманбап эч алуучу жай менен эле камсыздабастан, андан түшкөн каражат шаар казынасын да толуктап турат. Бул курулушка 74 млн. 300 миң сом коротулду. Ал эми Ч.Айтматов аймактык башкармалыгында 150 орунга ылайыкташкан, эки кабаттуу балдар бакчасы да курулду. Бул үчүн 88 млн. 600 миң сом керектелген.
Ошондой эле, жаш балдарды олимпиадалык оюндарга даярдоочу республикалык колледж да түптөлдү. Тагыраагы, калаадагы № 1 кесипчилик лицейдин имараттары капиталдык оңдоп-түзөөдөн өтүп, ага жатакана, ашкана, окуу бөлүмөлөрү, машыгуу залдары менен кошо салынган. Анын курулушуна 117 млн сом жумшалган.
Бөлүнгөн 2 млрд сомго жасалат делген жумуштардын ичинде 3 кабаттан турган инновациялык IT-технологияларын окутуу борбору да бар болчу. Бүгүнкү күндө анын имараты дээрлик курулуп бүтүп калды. Анда кураштырууга, техникага кызыккан жаратмандарды колдоодон сырткары, чет тилдерин окутуу үчүн да атайын шарттар түзүлөт. Бул курулушка дээрлик 65 млн сом коротулган.
Казынага каражат алып келчү долбоорлор
Шаар казынасына пайда алып келе турган ири заводдорду салуу да пландалган. Бул багытта асфальт-бетон чыгаруучу жана таш талкалоочу завод курулду. Ал шаар жолдорун оңдоого жана асфальттоого гана кызмат кылбастан, башка жеке жактарга коммерциялык да кызматты көрсөтөт. Андан түшкөн каражат шаар казынасын толуктап турат. Бул завод үчүн 111 млн 540 миң сом жумшалган.

Мындан сырткары, ушул эле сумманын ичинен мэриянын “Жол” башкармалыгынын техникалык базасын чыңдоо максатында, 4 даана “Шахман” үлгүсүндөгү оор жүк ташуучу жана бир даана Хундай портер үлгүсүндөгү автоунаалар сатып алынды. Жаңы техникалар учурда шаардын жолдорун оңдоп-түзөө, асфальт төшөө жумуштарында пайдаланылууда.
Жалал-Абад шаарында бак-дарактарды сугаруу маселеси көп жылдардан бери көйгөй болуп келген. Ал маселе да чечилип, техникалык суу чыгаруучу 4 скважинаны куруу жана аны реконструкциялоо иштери жүргүзүлдү. Натыйжада бир катар парктар, көчөлөр техникалык суу менен камсыз болуп, арыктар аркылуу бак-дарактар, гүлдөр сугарыла баштады. Бул үчүн 12 млн сомдон ашуун акча каражаты коротулган.
Республикалык бюджеттен бөлүнгөн 2 млрд сомдон бир топ акча каражаты үнөмдөлдү. Ал каражаттар кайра эле шаардын өнүгүүсүнө жумшала турган болууда. Тактап айтканда, таштандыларды кайра иштетүүчү завод куруу сыяктуу жумуштарга жумшалаары пландалууда.
Даярдаган: А.Белеков





















