Бүгүн, 13-майда, Жалал-Абад облусундагы Сузак районунда “Жалал-Абад” эл аралык аэропортунун курулушу башталды. Жаңы салына турган имарат эки кабат болуп, аянты 10 миң чарчы метрди түзөт. Аэропорт саатына 350 жүргүнчүнү өткөрүүгө ылайыкташат.
Капсула салуу аземине президент Садыр Жапаров да катышып, азыркы тапта өлкөбүздө авиажүргүнчүлөрдүн агымынын олуттуу өсүшү менен ички жана эл аралык аба каттамдарына суроо-талаптар жогорулоонун үстүндө экенин белгиледи.
«Соңку жылдары өлкөбүздө авиация тармагында кеңири реформалар жүргүзүлүп, коопсуздукту жогорулатуу, инфратүзүмдү жаңылоо, кадрдык базаны чыңдоо жана эл аралык стандарттарга шайкеш келтирүү багытында реалдуу жыйынтыктарга жетиштик. «Жалал-Абад» эл аралык жаңы аэропортунун курулушун баштоо буга айдан ачык мисал болуп бере алат», – деди президент.
380 гектардан ашык аянтка жайгашкан жаңы аэропорттун инфратүзүмү эл аралык стандарттарга жооп берет: 3800 метрлик учуу-конуу тилкеси, эки рулеждик жолчо жана алты учак токтотуучу жай аэропортко жүргүнчүлөрдү да, жүктөрдү да кабыл алууга мүмкүндүк берет.
Жаңы аэропорт 4E категориясына кирет, бул Boeing 737, Airbus A320 жана A321 сыяктуу чоң учактарды кабыл алуу мүмкүнчүлүгүн ачат.
Азыркы Жалал-Абад аэропорту 1938-жылы жайкы талаа катары ачылган. 1972-жылдан бери аэробекет имараты жана асфальтталган учуу-конуу тилкеси ачык. Быйыл бул жерде 80 миңден ашык жүргүнчүнү тейлөө күтүлүүдө.
«Жалал-Абад» эл аралык жаңы аэропорту жалпы Фергана өрөөнүндө логистика, соода, туризм жана инвестициялар үчүн жаңы мүмкүнчүлүктөрдү ачат.
2024-жылы Жалал-Абаддагы аэропорт 60 миңден ашык адамды тейлеген. Бүгүнкү күндө Бишкек-Жалал-Абад-Бишкек багыты боюнча күнүнө төрткө чейин каттам ишке ашырылууда.


















