Украинанын президенти Владимир Зеленский Орусия менен болгон жаңжалды жөнгө салуу боюнча келишимди жокко чыгарды.
Бул тууралуу америкалык лидер Дональд Трамп Fox News телеканалына берген маегинде билдирди.
Анын айтымында, украин тарап аскерий операцияларды жүргүзүүнү каалагандыктан, келишим түзүлгөн эмес. Эми Зеленский баарын жөнгө салгысы келет, деп кошумчалады ал.
“Биз келишим түзсөк болмок, бирок Зеленский периште эмес, ал күрөшүүнү чечти. Ал согуштун башталышына жол бербеши керек эле”,-деген Трамп.
Күн мурун Зеленский Путин менен сүйлөшүүнү жокко чыграгна эмес. Саясатчы коопсуздук кепилдиги маселеси Киев үчүн абдан маанилүү экенин, эгер Трамп Украинанын коопсуздугуна кепилдик бере алса, анда Киев дипломатиялык жолго түшөөрүн баса белгилеген.
Буга чейин ал дээрлик үч жылга созулган Орусия Украина чыр-чатагын токтотуу үчүн Владимир Путин менен жакын арада жолугууну каалай турганын, бейшембиде Давостогу Дүйнөлүк экономикалык форумдун катышуучуларына онлайн режиминде сүйлөп жатып билдирген.
“Кеп экономика же башка нерсе жөнүндө эмес, миллиондогон өмүрлөр жөнүндө болуп жатат жана бул согушту сөзсүз токтотушубуз керек”,-деди ал.
Орусия президентинин маалымат катчысы Дмитрий Песков күн мурун Орусия АКШ менен тең укуктуу диалогго даяр экенин жана Вашингтондон сигналдарды күтүп жатканын, бирок алар келе электигин билдирген.
АКШ президенти буга чейин Орусия Украинадагы согушту токтотуу боюнча сүйлөшүүдөн баш тартса, анда ага каршы жаңы санкцияларды киргизиши мүмкүн экенин билдирген.
Песков буга комментарий берип, Трамп биринчи президенттик мөөнөтүндө санкция ыкмаларын жактырганын, бирок Орусияга каршы достук эмес аракеттеринин кесепети болорун билдирген.
















