Быйылкы жылдын январь-март айларында Өзбекстан 2 миллиард 664 миллион 300 миң долларга алтын экспорттогон.
Өзбекстандын Статистика агенттигинин маалыматына караганда, бул көрсөткүч өткөн жылдын биринчи кварталына салыштырмалуу 10,5%га көп. 2023-жылдын бул мезгилинде өлкө тышка 2,4 миллиард доллардан ашык суммага алтын саткан.
Мурдараак Дүйнөлүк алтын кеңеши (World Gold Council) быйыл февраль айында 12 тонна алтын саткан Өзбекстан дүйнөдө эң көп алтын экспорттогон мамлекет болуп калганын жарыялаган.
Расмий маалыматка караганда, 2024-жылдын 1-апрелине карата Өзбекстандын алтын-валюта резерви 34 миллиард 190 миллион 300 миң долларды түздү.
Статистика агенттигинин отчетуна ылайык, Өзбекстандын тышкы соода жүгүртүүсү биринчи кварталда 15,82 миллиард долларга жеткен. Анын 6,38 миллиард доллары экспортко (бул сумманын 41,7%ы алтынды чет өлкөгө сатуудан түшкөн – ред.), 9,43 миллиард доллары импортко туура келет.
Тажикстандын кымбат баалуу металлдарды жана таштарды экспорттоосу 1250, 7 эсеге өстү?
Ал эми Тажикстандын кымбат баалуу таштарды жана металлдарды экспорттоосу үстүбүздөгү жылдын биринчи кварталында $298 млн.ду түзгөндүгүн өлкөнүн статистикалык ведомствосу маалымдады. Бул 2023-жылдын ушул мезгилиндеги көрсөткүчкө салыштырганда 1250,7 эсеге көп.
Аталган продукциялардын үлүшү өлкөнүн жалпы экспортунда 48,5%ды түзөт.
Жалпысынан республика быйылкы жылдын алгачкы үч айында $614 млн. суммасында товар жана продукцияларды экспорттогон.
Тажик продукциялары көп сатылган негизги өлкө экспорттун 48,6%ы туш келген Швейцария болуп саналат. Бул эң оболу аталган өлкөгө кымбат баалуу металлдар менен таштарды сатууга байланыштуу.
Тажикстандын тиешелүү ведомстволорундагы булактар кымбат баалуу металлдын, эң оболу монетардык алтындын экспорту эмгек мигранттарынан акча которуулар кескин азайып кеткенде жогорулай тургандыгын белгилешүүдө.
Бирок акча которуулар тууралуу маалымат ММК өкүлдөрүнө берилбейт.
Монетардык алтын – бул монета жана слитка же пластилин түрүндөгү башка кошулмалардан аффинаждык тазалоодон өткөн жана 995тен 1000ге чейинки тазалыктагы алтын болуп саналат. Куйма формасындагы металл дүйнөлүк «Good Delivery» стандартынын талаптарына жооп бериш керек. Адатта дүйнөнүн борбордук банктарынын же каржы министрликтеринин карамагында сакталат.
Алтын сатуу менен акча которуунун ортосундагы байланыш товар жана продукциялардын импорту үчүн валютанын жетишпестиги менен түшүндүрүлөт.
Анткени экспорттон түшкөн акчанын эсебинен товар жана продукциялардын импортуна керектүү валютанын үчтөн бир бөлүгүн гана жабууга болот.
Тажикстандын быйылкы жылдын биринчи кварталындагы жалпы импорту $1,5 млрд,га жакын сумманы түзүп, бул көрсөткүч өлкөнүн экспортунун көлөмүнөн дээрлик 2,5 эсе көптүк кылат.



















