Өзбекстандын Дин иштери боюнча комитети Жогорку сот тарабынан экстремизм жана терроризм идеяларын камтыйт деп табылган материалдардын жаңыланган тизесин жарыялаганын «Газета.uz» агенттиги жазды.
Бул тизмедеги материалдарды Өзбекстандын аймагында өндүрүүгө, сактоого жана жайылтууга тыюу салынат.
Комитет калкты социалдык түйүндөрдөгү төмөнкү баракчалар менен каналдардын материалдарын бөлүшпөөгө жана аларга “жакты” (Like) койбоого чакырды.
Тыюу салынган баракчалар менен сайттардын тизмеси акыркы жолу 2023-жылы май айында жарыяланып, анда 500гө жакын материал камтылган.
Быйылкы тизмеге Facebook’тагы 150, Instagram’дагы 100дөн ашык баракча, Telegram’да дээрлик 400 канал, ондогон OK.ru баракчасы, YouTube-каналдар жана TikTok аккаунттар, ошондой эле социалдык түйүндөр менен сайттардагы аудио, видео жана текст түрүндөгү материалдар кошулган.
Экстремизм жана терроризм идеяларын камтыган материалдардын жаңыланган тизмеси
Өзбекстанда тыюу салынган контенттерди жарыялаган ресурстарды Дин иштери боюнча комитет Мамлекеттик коопсуздук кызматы, Ички иштер министрлиги, Маалымат жана массалык коммуникациялар агенттиги менен кызматташтыкта аныктайт.



















