Өзбекстанда мигранттарга алардын жумушчу визасынын, жолдо жүргөн билетинин, чет тилдерин билгендиги тууралуу жана кесиптик квалификациясын текшерүүгө кеткен чыгымдын бир бөлүгүн мамлекет төлөп берет. Бул тууралуу президентке сунушталган таанытымда (презентация) жарыя кылынгандыгын centralasian.org. маалымат каражаты билдирди.
Аталган документте эмгек мигранттарына жумушчу визасын алуунун, билеттин, чет тилин билгендиги тууралуу жана квалификациясын текшергендеги чыгымдын бир бөлүгү компенсация болору белгиленген.
Чет тилин билгендиги тууралуу эл аралык жана ага эквиваленттүү сертификатты алган жаранга тилди үйрөнгөндүгү үчүн кеткен чыгымдын 50%ы мамлекет тарабынан кайтарылып берилет.
Улуу Британия, Германия, Польша, Венгрия, Япониядагы Өзбекстандын элчиликтеринде жана консулдуктарында эмгек миграциясы боюнча аттеше кызматын, ал эми Сауд Аравиясында – агенттиктин өкүлчүлүгүн киргизүү пландаштырылууда. .
Элчиликтерде жана министрликтерде чет өлкөдөгү өзбекстандыктардын көйгөйүн тез арада чечүү үчүн сутка боюу иштеген колл-борборлор уюштурулат.
Эмгек миграциясынан кайтып келген жаранды жумушка кабыл алган ишканага ар бир кызматкер үчүн Жумуш менен камсыз кылуу фондунун эсебинен ай сайын 500 миң сум өлчөмүндө субсидия төлөнүп турат.
Бул иш чараларга быйылкы жылы 100 миллиард сум ($8 млн. долларга жакын) бөлүнөт.


















