Парижде өтүп жаткан Олимпиада оюндарында кыргызстандык балбан Үзүр Жусупбеков грек-рим күрөшүнөн 97 килограммга чейинки салмакта чейрек финалда ирандык балбан Мохаммадхади Саравиге 0:8 эсебинде утулуп калды.
Ирандык спортчу финалга чыкса кыргыз балбанына коло медаль үчүн күрөшүүгө мүмкүнчүлүк болот.
Кыргызстандык спортчу буга чейин 1/8 финалда литвалык Миндаугас Венцкаитис менен кездешип 5:1 эсебинде женип, чейрек финалга чыккан.
Үзүр Жусупбековдон сырткары дагы бир кыргызстандык балбан Акжол Махмудов грек-рим күрөшүнөн 77 килограммга чейинки салмакта чейрек финалда казакстандык Демеу Жадраевге 1:3 эсебинде жеңилип калды.
Махмудов ага чейин 1/8 финалда АКШ балбаны Камал Амир Бейди 4:1 эсеби менен утуп, чейрек финалга чыккан болчу.
Эми казакстандык балбан Демеу Жадраев финалга чыкса, Махмудовго коло байге үчүн күрөшүүгө жол ачылат.
Буга чейин Мээрим Жуманазарова чейрек финалда япониялык Нонока Одзакини 8:6 эсебинде жеңип, Олимпиаданын финалына чыккан.
Ал эми Жоламан Шаршенбеков япониялык Кеничиро Фумитага утулуп, Олимпиаданын финалына чыга албай калган.
Бүгүн, 6-августта, Жуманазарова финалда алтын медаль үчүн, ал эми Шаршенбеков коло медаль үчүн күрөшмөкчү.
XXXIII Жайкы Олимп оюндарына Кыргызстандан 16 спортчу спорттун беш түрү: күрөштүн түрлөрү (грек-рим, эркин, кыз-келиндер), бокс, дзюдо, жеңил атлетика жана сууда сүзүү боюнча күч сынашууда.
Олимп оюндары 24-июлда башталып, 11-августта аяктайт.















