Россиянын президенти Владимир Путин менен Түндүк Кореянын лидери Ким Чен Ын “Восточный” космодромунда кыскача сүйлөштү, деп жазды РИА Новости.
Түндүк Кореянын лидери Путинге бош убактысынын жоктугуна карабай чакырганы үчүн ыраазычылык билдирди. Путин ага жооп катары, жолугушуу КЭДР үчүн маанилүү даталарда өтүп жатканын белгиледи.
Мамлекет башчылары космодромду көрүп чыгып, андан соң сүйлөшүүлөрдү жүргүзүшөт.
Түндүк Кореянын лидери Ким Чен Ын түшкөн брондолгон поезд Приморье крайына кечээ, 12-сентябрда келген.
Аны бул сапарда КЭДРдин Тышкы иштер министрлигинин башчысы Чхве Сон Хи, Жумушчу партиясынын Борбордук Комитетинин аскердик башкармалык бөлүмүнүн башчысы Пак Чон Чхон жана борбордук аскердик комитеттин башчысынын орун басары Ли Бён Чхоль коштоп жүрөт.
РФ президентинин маалымат катчысы Дмитрий Песков буга чейин эки өлкөнүн лидерлери делегациялардын курамында да, жекеме-жеке да боло турган сүйлөшүүлөрүндө эки тараптуу кызматташуу, анын ичинде соода-экономикалык байланыштар жана маданий алмашуу маселелери талкууланарын билдирген.
Ошондой эле, Кремлдин өкүлүнүн айтымында, аймактагы кырдаал жана жалпысынан эл аралык иштер боюнча бай пикир алмашуу болорун айткан.
Белгилей кетсек, АКШнын Мамлекеттик департаменттин басма сөз кызматынын башчысы Мэтью Миллер АКШ Түндүк Кореянын лидери Ким Чен Ындын Россияга сапарына кылдат байкоо жүргүзүү ниетинде, анын жыйынтыгына жараша жаңы санкциялар киргизилиши мүмкүн экенин брифингде билдирген.
«Биз бул жолугушуунун жыйынтыгына абдан кылдаттык менен көз салып турабыз. Түндүк Кореянын Россияга кандайдыр бир курал-жарак берүүсү БУУнун Коопсуздук Кеңешинин бир нече резолюциясын түздөн-түз бузуу болуп саналарын эки өлкөгө тең эскертип кетким келет», — деген ал.
















