Баткен облусунун Лейлек районундагы “Арка” токой чарбасынын Кара-Сай участкасында 2023-жылдын 19-ноябрында жүргүзүлгөн атайын рейддин учурунда, белгисиз себептер менен жарат алып, уча албай калган бүркүт табылган. Аны аталган токой чарбанын егери Бакытбек Саттаров таап, өз үйүндө кармап, багып турган.
Бүркүттү 23-ноябрда расмий документтердин коштоосу менен “Германиянын табиятты коргоо уюмунун (NABU)” КР филиалынын (NABU-Кыргызстан) Түштүк бөлүмүнө өткөрүп беришти. Учурда бүркүт аталган бөлүмдүн Мыйзамсыз аңчылыкка каршы күрөшү боюнча “Барс-2” тобунун жетекчиси Мамасали Айдарбековдун аракети менен Ош шаарына алынып келди. Андан ары уюмдун Чүй облусунун Кемин районундагы Суулуу-Терек жайлоосундагы реаблитациялык борборуна жөнөтүү аракети көрүлүүдө. Ал жерде атайын адистердин тыкыр көзөмөлүндө багылып, калыбына келтиргенден кийин жапайы жаратылышка кое беришет.
NABU-Кыргызстан Эл аралык уюму жапайы жаратылышка аяр мамиле кылуу жана кызыл китепке керген, айрыкча ак илбирсти коргоо максатында атайын долбоордун үстүндө иш алып барат. Анын алкагында, жарат алган жапайы жан-жаныбарларды реаблитациялоочу атайын борбору иштейт. Бул жерде бүркүттөрдөн тартып, ак илбирс, бөрү, сүлөсүн сыяктуу ар кандай себептер менен жарат алып калган жаныбарлар багылат жана алар калыбына келгенден кийин өз алдынча жашашы үчүн жаратылышка кое берилет.
Белгилей кетсек, аталган реаблитациялык борбордо алты ай багылып, калыбына келтирилген сүлөсүн ушул жылдын июль айында Нарын облусундагы Каратал-Жапырык мамлекеттик жаратылыш коругунун аймагына кое берилген.






















