Үстүбүздөгү жылдын 4-февралында тажик тараптын чакыруусу боюнча Кыргыз Республикасынын Тышкы иштер министри Жээнбек Кулубаев Тажикстан Республикасына расмий сапар менен барды. Бул тууралуу КРнын тышкы иштер министрлигинин расмий сайтында маалымат берилген.
Расмий визиттин алкагында 2024-жылдын 4-февралында Душанбе шаарында Кыргыз Республикасынын Тышкы иштер министри Жээнбек Кулубаев менен Тажикстан Республикасынын Тышкы иштер министри Сироджиддин Мухриддиндин тар жана кеңейтилген форматта жолугушуулары болуп өттү.
Сүйлөшүүлөрдүн жүрүшүндө Кыргыз Республикасынын Тышкы иштер министри Кыргыз Республикасы Тажикстан Республикасы менен ынак коңшулук мамилелерди мындан ары да бекемдөөгө умтуларын белгиледи.
Министр Ж.Кулубаев белгилегендей, кыргыз-тажик мамлекеттик чек арасын делимитациялоо жана демаркациялоо иштерин толук бүтүрүү тараптарга өз ара кызыкчылык туудурган бардык багыттар боюнча эки тараптуу кызматташууну активдештирүүгө мүмкүндүк берет. Кыргыз тарап кыргыз-тажик мамлекеттик чек арасын делимитациялоо маселесин ар бир тараптын кызыкчылыгын эске алуу менен тез арада жана өз ара пайдалуу чечүүгө умтулат.
Эки өлкөнүн тышкы иштер министрликтеринин башчылары кыргыз-тажик мамилелеринин саясий, соода-экономикалык жана маданий-гуманитардык тармактарындагы абалын жана келечегин талкуулашты.
Дүйнөдөгү жана региондогу абал боюнча пикир алмашуу болду.
Тараптар ошондой эле БУУ, ЕККУ, ШКУ жана башка эл аралык уюмдардагы кызматташуунун алкагындагы өз ара кызматташууну талкуулашты.
Сүйлөшүүлөрдүн жыйынтыгында 2024-2026-жылдарга Кыргызстан менен Тажикстандын Тышкы иштер министрликтеринин ортосунда кызматташуу программасына кол коюлду.
Белгилей кетүүчү жагдай, 12-январда Баткенде өкмөттүк делегациялардын теңтөрагалары Камчыбек Ташиев менен Саймумин Ятимов жолугушкан. Биргелешкен билдирүүдө чек ара аймагы боюнча орток пикир табылганы айтылган.



















